Centro di Bario Noord ta sigui cumpli cu su mision pa fortalece bienestar y union den nos comunidad cu e lansamento di un serie nobo di charla di informacion y educacion di salud, titula “BAN PAPIA SALUD.”

E iniciativa ta nace for di un deseo di empodera nos habitantenan cu conocemento esencial tocante salud fisico, mental y emocional, y ta un parti importante di e compromiso di Centro di Bario Noord pa promove un estilo di bida saludabel y un comunidad mas fuerte.

E serie ta wordo facilita pa Dokter Aveline Figaroa, un profesional di salud cu hopi aña di experiencia den e area di medicina y bienestar. Durante e charla, Dokter Figaroa ta comparti informacion practico, orientacion util, y conseho basa riba evidencia cientifico pa yuda ciudadanonan di tur edad cuida miho di nan mes.

E prome sesion, cu a tuma luga den september, tabata titula “Fundacion Vital”, y a conta cu un asistencia positivo di varios habitantenan di Noord y Aruba. E charla a cubri temanan manera e importancia di prevencion, movemento, alimentacion saludabel y maneho di stress— un base vital pa un bida saludabel.

Awo, Centro di Bario Noord ta invita tur hende pa participa den e di dos sesion di e serie “BAN PAPIA SALUD,” cu ta trata un tema sumamente importante pa bienestar di hende muhe:

“Menopausa.”

Fecha: Diahuebs 23 di october 2025​

Orario: 7:00 PM – 9:00 PM​

Lugar: Centro di Bario Noord

Durante e sesion aki, Dokter Figaroa lo amplia riba e tema di menopausa — un etapa natural den bida di cada hende muhe. E lo splica con ta identifica e cambionan di e curpa y di mente, con pa maneha nan di forma natural, y con pa busca sosten medico y emocional durante e proceso aki.

E prome dos sesionnan ta solamente e comienso di un serie mas amplio, cu lo inclui hopi topiconan relevante manera:

●​ Salud mental y bienestar emocional​

●​ Nutricion y actividad fisico​

●​ Prevencion di malesa cronico​

●​ Importancia di control preventivo​

Centro di Bario Noord ta invita tur ciudadano — tanto homber como muhe, hoben y mayor — pa keda pendiente y sigui e serie aki cu regularmente lo sigui bira un plataforma di aprendizahe y union comunitario.

“BAN PAPIA SALUD” ta patrocina pa CEDE Aruba su iniciativa di “BarioUnico.”

Pa mas informacion, contacto Centro di Bario Noord via tel. 568-2935, y sigui nos riba Facebook pa update di e proximo sesionnan. Hunto nos ta construi un comunidad mas fuerte, feliz, y mas saludabel.