Ministerio di Educacion y Deporte di Aruba, bao di liderazgo di Minister Gerlien Croes (Futuro), y Consulado General di Merca na Corsou a firma un Memorandum Of Understanding (MoU) pa reestablece un Comprehensive Education USA Advising Center na Aruba. Esaki ta un paso strategico cu ta amplia e posibilidad pa nos studiantenan pa obtene informacion gratis, exacto y acredita tocante estudio superior na Merca.
Den su palabra, Minister Croes a subraya e importancia nacional di e acuerdo: “Nos ta inverti den futuro di nos yiu. Aruba mester un sistema cu ta habri portanan y trece mas oportunidad. Cu EducationUSA Center, nos ta eleva Aruba y ta duna nos studiantenan oportunidad real pa logra un educacion di nivel mundial.”
Un aliansa cu ta amplia e horizonte educativo pa Aruba
A traves di e acuerdo, e Ministerio di Educacion lo:
Hiba e Centro EducationUSA na un espacio mas publico pa garantisa acceso amplio;
Ekipa e oficina di EducationUSA cu Advisers y coordinators full-time;
Sigura cu tur studiante, scol, y famia por haya informacion actualisa y accesibel.
Na su banda, Consulado General Mericano y Coordinador consehero Regional Educacional Mericano (REAC) lo:
Provee entrenamento oficial pa e asesornan di studiantenan;
Suministra material educativo y recurso tecnico;
Otorga apoyo programatico anual pa fortifica operacion di e centro;
Sigura cu Aruba ta opera den conformidad cu e EducationUSA Global Standards y e “Principles of Good Practice”.
E Centro lo sirbi como un hub di oportunidad y guia profesional
E Advisory Center lo:
Duna orientacion individual y den grupo;
Drenta den scolnan y comunidad cu e informacion;
Organisa tayer y presentacion educativo;
Provee informacion actualisa tocante aplicacion, beca, visa di studiante y universidadnan acredita na Merca.
Minister Croes a enfatisa cu esaki ta un paso determinante den fortalece guia y oportunidadnan den exterior pa nos hobennan.
“Educacion ta un pilar di transformacion. Pa keda relevante den un mundo cu ta cambia, nos studiantenan mester tin orientacion profesional cu ta basa riba realidad, necesidad y deseo y, no riba suerte. E Centro aki ta un inversion directo den futuro di nos pais,” e minister a bisa segun un comunicado di gobierno.
