(AP) – Hefe ehecutivo di Ford ta bisa cu e ta premira cu e costo di construccion pa vehiculo electrico lo disminui asina hopi cu den e proximo añanan e fabricantenan di e vehiculonan aki lo ta luchando den e mercado bendiendo e vehiculonan electrico pa mas o menos 25,000 dollar.

CEO Jim Farley a bisa na Bernstein Strategic Decisions Conference riba diaranson cu e prijs di 25,000 lo democratisa vehiculonan electrico. Materialnan pa fabrica e vehiculo lo costa alrededor di 18,000 dollar, el a comenta. “Pa e motibo aki mi ta kere cu nos industria definitivamente ta den direccion di un guera di prijs,” Farley a bisa.

Actualmente e ta costa hopi mas pa construi un vehiculo electrico compara cu un vehiculo cu ta usa motor di gas, Farley a nota. E compania su Mustang Mach-E Electric SUV, cu un prijs di 44,000 dollar ta costa mas o menos 25,000 dollar mas cu un Ford Edge Gas SUV.

E costo di bateria so ta 18,000 dollar, y e charger ta agrega un otro 3,000 dollar.

Sinembargo reduccion di costo grandi ta bin cu e kimica nobo di bateria cu ta usa menos metal caro y escaso manera Nickel y Cobalt, el a splica. Ademas, vehiculonan electrico lo tuma menos tempo y labor pa fabrica, cual ta spaar mas placa Farley a declara.

Ford tambe tin plan di disminui e costonan di distribucion, cual ta mas o menos 2,000 pa cada vehiculo mas compara cu Tesla, e lider den benta di vehiculo electrico. Esaki por ser haci pa medio di disminui e gastonan di dealer cu ta bende e producto y pa medio di baha e costo di promocion.

Ford, di mesun manera cu Tesla, probablemente no lo mester cumpra promocion pa bende su vehiculonan electrico, cual actualmente ta mas o menos 500 pa 600 dollar pa cada vehiculo segun Farley. Ford ta diseñando e siguiente generacion di vehiculonan electricto cu un “simplificacion radical” di e labor cu e ta tuma pa fabrica e vehiculonan aki, Farley a bisa. “Pa medio di cambia e ingenieria di e vehiculo pa minimalisa e tamaño di e bateria, mirando cu e ta asina caro, lo cambia e mercado pa e productonan aki,” Farley a expresa.

Ford tin plan di diferencia su mes y aumenta e ganashi pa medio di bende servicio di programacion, incluyendo asistencia pa chauffeur y funcionnan autonomo cu por e persona por huur pa un periodo di tempo of pa un cierto cantidad di kilometer.

Tur e factornan aki conhuntmente ta disminui diferencia di costo di 25,000 y ta aumenta e ganashi, te hasta cu e costo di material crudo premira di aumenta segun Farley.