(AFP) – ChatGPT lo mester cumpli cu reglanan di seguridad mas estricto despues cu Union Europeo (UE) a agrega e servicio dialuna na un lista di plataformanan digital cu ta bao di mayor supervision legal na Europa. Ta prome biaha cu un chatbot di inteligencia artificial ta haya e clasificacion aki.
Bruselas tambe a clasifica Reddit y e plataforma di wega popular Roblox como plataformanan online “hopi grandi”, un categoria cu ta bini cu obligacionnan adicional y supervision mas estricto.
“ChatGPT, Reddit y Roblox awo lo ser someti na un nivel mas halto di supervision y responsabilidad den Union Europeo, conforme e impacto grandi cu nan tin riba nos ciudadanonan y sociedad,” hefe di tecnologia di UE, Henna Virkkunen, a bisa.
E clasificacion di “hopi grandi” ta aplica na plataforma y motor di buskeda cu tin mas di 45 miyon usuario activo pa luna den e bloc di 27 pais. Segun Comision Europeo, ChatGPT, Reddit y Roblox tur a reporta cu nan ta pasa e limite ey.
E tres servicionan awo tin cuater luna pa cumpli cu obligacionnan adicional bao di Digital Services Act (DSA), un ley riba contenido digital cu ta un di e instrumentonan legal principal cu UE ta usa pa pone mas control riba gigante di tecnologia.
E obligacionnan ta inclui evalua y reduci riesgonan relaciona cu propagacion di contenido ilegal, efecto negativo riba menor di edad, bienestar fisico y mental di usuarionan, derechonan fundamental, procesonan electoral y seguridad publico.
Pa pone ChatGPT bao di alcance regulatorio di DSA, Comision Europeo a clasifica e servicio como un motor di buskeda.
ChatGPT tin mas di 159 miyon usuario na UE
E chatbot di inteligencia artificial, desaroya pa compania Mericano OpenAI, a reporta mas di 159 miyon usuario na Union Europeo na final di maart, representando mas di un tercer parti di poblacion di e bloc.
ChatGPT a bisa cu e ta “preparando pa cumpli cu e rekisitonan adicional” cu ta bini cu e nobo clasificacion.
Roblox, na su turno, a bisa cu e ta “orguyoso di ta e prome plataforma di wega” cu ta haya e clasificacion di “hopi grandi” na UE.
“Seguridad ta forma base di tur loke nos ta haci y nos ta spera di sigui cu nos cooperacion constructivo cu Comision Europeo,” gerente general di Roblox pa Europa, Joost Hagesteijn, a bisa.
Roblox ta particularmente popular entre muchanan y ta conoci pa su mundonan virtual cu grafica yen di color. Segun e plataforma, e tin 46,6 miyon hungado activo na UE, net riba e limite cu DSA ta establece pa supervision mas stricto.
Reddit, e plataforma Mericano grandi di dialogo online, ta bisa cu e tin mas di 57 miyon usuario den e bloc.
UE ta intensifica control riba plataformanan digital grandi
E nobo clasificacionnan ta bini mientras UE ta aumenta aplicacion di su reglanan contra e plataformanan digital mas grandi di mundo, incluyendo hopi compania Mericano, a pesar di fuerte oposicion for di Merca y menasanan di represalia.
Separadamente, UE tambe a adopta algun di e reglanan mas amplio na mundo pa controla inteligencia artificial.
Su AI Act a drenta na vigor na 2024, cu diferente obligacion cu ta drenta gradualmente na vigor durante varios aña pa limita usonan potencialmente peligroso di e tecnologia.
Lena-Maria Boswald, di centro Aleman di investigacion tecnologico Interface, a bisa prome cu clasificacion di ChatGPT cu e paso spera aki lo establece un “precedente” y lo “influencia expectativanan regulatorio pa tur sistema grandi di AI generativo cu ta ser usa den UE.”
Segun Boswald, OpenAI ya tin obligacionnan pa maneha riesgo bao di AI Act, pero DSA por amplia alcance di e responsabilidadnan.
Multa por yega te 6% di entrada global anual
Alrededor di 30 servicio actualmente ta riba lista di UE pa supervision adicional bao di DSA.
Mayoria ta pertenece na companianan tecnologico grandi manera Google, Apple, Microsoft, TikTok, X, Amazon y Shein. E lista tambe ta inclui varios website pornografico y enciclopedia colaborativo online Wikipedia.
Companianan cu viola e ley por enfrenta sancionnan severo, incluyendo multa di te 6% di nan entrada global anual.
Den caso di violacionnan serio y repetitivo, un compania incluso por enfrenta prohibicion pa opera na Europa.
Recientemente, UE a ordena TikTok pa cambia aspectonan di su diseño cu reguladornan ta considera adictivo, of enfrenta multanan grandi bao di DSA.
Te awo, e bloc a impone sancion bao di e ley contra tres compania: gigante di compras online Temu y AliExpress, y plataforma social X di Elon Musk.
X a haya un multa di €120 miyon, aproximadamente USD 138 miyon, pa violacionnan relaciona cu transparencia y otro violacionnan.
