Chauffeurnan di truck ta protesta te oranan di anochi

Ayera tardi un grupo di chauffeur di truck a blokia e rotonde nobo cu ta den construccion y tranca caminda pa basta ora na Cumana.

E chauffeurnan a dicidi di manifesta despues di a haya sa cu tin trucknan cu a bin di afo pa haci trabaonan necesario den e Watty Vos Boulevard. Na luga di uza trucknan local, segun nan. Aparentemente contratista encarga Mota Engel a importa un gran cantidad di truck for di Peru locual no a cay den bon tera di chauffeurnan di trucknan local. A papia di 20 pa 30 truck cu a yega Aruba cu ta cla pa wordo uza y e chauffeurnan local ta exigi pa esakinan wordo manda bek.

Chauffeurnan hopi rabia
E chauffeurnan a laga sa cu si no bin na un acuerdo lihe, e manifestacion por bira pio y sigui otro siman sin duda. Un di e chauffeurnan, sr. Elton, ta conta nos cu na Aruba tin suficiente truck, operadornan y trahadonan cu por maneha e trabaonan necesario. “Tin tur cos aki anto nan kier bin cu otro di afo. Nos no ta traha por nada, nos no ta traha pa e prijs cu nan kier paga. Esaki ta un proyecto miyonario cu ta asina grandi anto no tin nada pa nos? Of nan no por paga nos locual nos ta cobra? E no ta husto.”  “Nos mes por. E problema no ta cu no tin placa, nan kier paga loke nan kier. Nos tin tur cos, no falta nada”, asina e chauffeur ta comenta.

Protesta espontaneo
Polis a acudi mesora na e sitio pa controla e situacion y desvia trafico. Alto comisario Dolfi Richardson tambe tabata na sitio pa un rato. “Via Central nos a haya un melding cu trucknan heavy equipment mester a blokia rotonde banda di Codemsa. Nos di parti cuerpo a percura pa e fluho di trafico sigui bon. Aparentemente tin disgusto entre chauffeurnan y nan ta rekeri presencia di minister pa discuti nan problemanan,” sr. Richardson ta conta Bon Dia Aruba.

Nos a puntra e comisario si e tabata na altura di e manifestacion aki y a pidi permiso pa tene un accion. E ta contesta: “No. Esaki ta djis un protesta espontaneo manera nan ta bisa. Mirando cu trafico no a wordo stroba, nos a laga nan un rato expresa nan disgusto pa despues wak con ta logra yega na un solucion rapido.”

Reunion cu DOW
Despues di a keda basta rato na e rotonde nobo di Cumana, e chauffeurnan a dicidi di marcha hunto den nan trucknan direccion departamento DOW 8’or di anochi. Akinan nan a confronta entre otro e contratista encarga cu e proyecto di Watty Vos como tambe director di DOW, Marlon Croes. Un grupo di seis chauffeur a drenta edificio di DOW hunto cu directiva pa asina purba dialoga y yega na un acuerdo. Pa ora cu nos a cera corant ayera nochi, ainda nos no a scucha mas kico tabata resultado di e reunion aki. Pero nos lo ta pendiente cu entre otro e departamento,gobierno y e chauffeurnan pa wak si a logra yega na algo.

You May Also Like

Nestlé na Chile ta suministra ocho fabrica 100% cu energia solar y biento

(Emol.cm) – Energia di biento y solo lo abastece pa 100% e ocho fabricanan ...

Turista deteni sospecha di fraude cu credit card

Diadomingo den oranan di mainta, na momento cu un famia turista kier a bandona ...

Situacion di refineria ta keda delicado y dificil

E situacion pa locual ta e refineria ta keda delicado y dificil. Y asina ...

rocco tjon director kia.jpg

Entrante 1 juni Rocco Tjon director di KIA

Chief of staff di Cuerpo Policial di Aruba Inspector Rocco Tjon lo bira director ...

Gobierno di coalicion lo baha edad di pension di 65 pa 62 aña di biaha

E gobierno nobo cu ta den proceso final di formacion ta determina pa baha ...

Picture 1

Entrante 1 di maart Serlimar lo cuminsa cobra e Tarifa Residencial

ORANJESTAD – E tarifa residencial por paga pa luna Awg.25.00, pa cuartal Awg.75.00, mita ...