Presidente di Chile, Sebastián Piñera, diabierna pasa a confirma cu su Gobierno lo bay manda pa Brasil cuater avion pa combati e candela cu ta destrosa un parti grandi di e vegetacion di Amazon.
Asina e mandatario Chileno a destaca na e prome conferencia di prensa despues di su regreso di e cumbre G7 y e bishitanan den su biahe na Brasil y Paraguay, ambos pais cu tambe ta den e lucha contra e candelanan.
“Chile ta colaborando caba cu un avion AT8, cu ta un Air Truck 8, capaz di desplega 3.000 liter di awa pa cada vuelo. Y proximamente nos lo bay manda cuater avion ekivalente pa Brasil”, e Presidente Chileno a afirma na un conferencia desde e Palacio di La Moneda, sede di ehecutivo Chileno na Santiago.
E pais Sur Americano diamars pasa ya a manda un aeronave pa Paraguay, pa yuda e Gobierno di Presidente Mario Abdo Benítez pa enfrenta e teritorio kima nort di e pais, na e zona tripel frontera cu Brasil y Bolivia.
Di e pais Andino, Piñera a señala diabierna pasa cu tambe a ofrece ayudo pa Evo Morales y cu Chile ta prepara pa ‘haci e mayor y miho colaboracion posibel pa enfrenta e situacion dificil aki’.
E fondonan acorda pa combati e candelanan na Amazon durante e desaroyo di e cumbre di 7 pais, cu ta compronde e grupo aki (Alemania, Canada, Merca, Francia, Italia, Hapon y Reino Uni) e siman pasa na Francia ta alcansa e 20 miyon di euro.
