(AP) – China su minister di ambiente Minister Juang Runqiu a bisa diahuebs cu su pais kier fortalece e cooperacion cu Merca pa por combati e cambio di clima durante reunion cu Gobernador di California Gavin Newsom na Beijing.
Newsom ta riba un tour di China unda e lo pusha pa cooperacion pa clima. Su biahe como gobernador, considera un rutina antes, ta halando atencion mirando cu esaki ta bini despues di varios aña cu tension entre Merca y China.
E clima ta un di e problemanan unda Merca y China a keda di acuerdo cu nan lo traha hunto. Relacionnan entre e dos paisnan a deteriora den añanan recien a causa di practicanan den importacion y exportacion, bareranan di tarifa, abusonan di derechonan humano y e estado di Taiwain, e isla autonomo cu China ta considera su propio teritorio.
Huang a bisa diahuebs cu su ministerio lo sigui ehecuta acuerdonan bao un MoU cu a firma aña pasa entre China y California “den inversion di mercado di carbon, adaptacion di clima, implementacion di ley di ambiente y intercambio di humano pa humano pa fortalece cooperacion y tin un efecto positivo riba e cooperacion ambiental di Merca y China.”
California ta un lider den regula polucion di aire y otro problemanan di relaciona cu clima, Newsom a comenta durante su remarcanan di apertura. “Pero tambe nos ta reconoce e limitenan di liderazgo subnacional. Nos tin mester di mas partner. Y mi ta aki cu e spirito di partnership y humildad, reconociendo cu nos no tin tur e contestanan,” e gobernador a expresa. Ambos banda a papia tocante un aumento den temponan extremo den cada pais respectivamente.
California y China a publica un declaracion riba diaranson unda nan a compromete pa traha hunto pa combati cambio di clima, incluyendo bientonan, tecnologianan pa warda energia avansa y vehiculonan cu cero emision segun e texto.
