(AP) — Un tripulacion di tres astronauta lo sali na juni pa un mision di tres luna abordo di e stacion espacial nobo di China, segun un oficial espacial cu tabata e prome astronauta di e pais den orbita.
E plan pa e prome tripulacion di e stacion a keda confirma na television estatal pa Yang Liwei, e hefe interino di diseño di e programa espacial cu tripulacion, mientras a lansa un astronave automatisa cu combustibel y suministronan pa e stacion Tianhe.
E Tianhe, of Harmonia Celestial, ta e di tres y di mas grandi entre e stacionnan espacial lansa pa e programa espacial cada bes mas ambicioso di China. Su modulo nuclear a ser lansa den orbita dia 29 di april.
E capsula Shenzhou transportando e tripulacion lo wordo lansa for di base Jiuquan den nort occidente di China, Yang a bisa den comentarionan transmiti diasabra riba Television Central di China.
Nan lo practica caminata espacial y ehecuta reparacion y mantencion, como tambe operacionnan cientifico. Yang, kende a orbita Tera na 2003, no a duna detaye di identidad di e astronautanan ni fecha pa e vuelo, y a bisa cu e rtipulacion lo bin di e dos grupo anterior di astronauta di e programa. Contestando si muhenan lo ta den e grupo, Yang a bisa: “Riba Shenzhou 12 nos no tin nan, pero misionnan despues di esaki lo bay tin nan.”
E agencia espacial tin plan pa un total di 11 lansamento te cu fin di proximo aña pa entrega dos modulo mas pa e stacion di 70 ton, suministro, y e tripulacion.
Beijing no ta participa den Stacion Espacial Internacional, principalmente pa motibo di obhecion di Merca. Washington no ta confia e secresia di e programa Chines y su conexion militar.
China a manda 11 astronauta, incluyendo dos muhe, den espacio cuminsando cu e vuelo di Yang na october 2003. E prome astronauta femenino tabata Liu Yang na 2012.
