(AP) – Un ciudad na parti nort di China a mata 3 pushi di cas despues cu nan a test positivo pa COVID-19, segun reporte den medionan di comunicacion local ayera, mientras cu e pais ta keda aumenta medida estricto pa contene cualkier brote nobo.
Autoridadnan na Harbin, unda cu recientemente a descubri 75 caso nobo, a bisa cu a tuma e accion pa motibo cu no tin tratamento disponibel pa animalnan cu e malesa, y nan lo a pone e doño y otro residentenan di e compleho di apartamento den peliger, Beijing News Online a bisa.
E doño a test positivo pa e virus riba dia 21 di september, y a drenta isolacion despues di a laga cuminda y awa pa e pushinan.
Un trahado di comunidad a pasa e apartamento y a tuma test di coronavirus di e tres pushinan, cu dos biaha a duna resultado positivo. Aunke cu e doño, identifica solamente como Liu, a pidi pa no haci esaki, a pone e pushinan drumi riba diamars atardi.
E hecho di tin mascota na cas ta birando hopi popular na China, y e noticia den corant a genera mas di 52,000 comentario.
Segun Merca su Centers for Disease Control and Prevention, e riesgo cu un animal lo transmiti SARS-Cov-2, e virus cu ta causa COVID-19, na persona ta considera “hopi abao,” aunke cu e ta posibel pa hende infecta bestia den cierto situacion, manera den contacto hopi cercano.
Ya caba a reporta COVID-19 den criadero di mink na varios diferente pais, incluyendo casonan den cual a sugeri cu humanonan por a keda infecta pa via di e bestianan, instando matamento di e bestianan den cantidad grandi.
“Hendenan sospecha of confirma cu COVID-19 mester evita contacto cu animal, incluyendo mascota di cas, cuminda y bia salvahe,” Centers for Disease Control and Prevention a bisa riba nan website.
“Na e momentonan aki, no tin evidencia cu bestia ta hunga un rol importante” den e plamamento di e virus na persona, segun Centers for disease Control and Prevention.
“Algun caso di coronavirus cu ta infecta e bestia por transmiti na persona, y despues transmiti di hende pa hende, pero esaki ta poco comun. Esaki ta loke a pasa cu SARS-CoV-2, cual probablemente a origina den vleermuis,” Centers for Disease Control and Prevention a bisa.
E teoria ta cu e virus a ser pasa di vleermuis pa humano, posiblemente pa medio di especie intermedio, manera e pangolin of e raton di bamboo, cual ta un faborito di e cientificonan pa conduci estudio tocante e origen di COVID-19, cu prome a keda detecta na e ciudad central Chino di Wuhan, den fin di aña 2019.
Grupo di derecho di animal PETA a bisa cu e animalnan mester ser trata “di mesun manera cu ta trata hende” y cu e no a mira ningun evidencia cu hende humano a ricibi e virus pa medio di pushi.
“PETA a urgi doño pa proteha nan mes y nan mascota pa medio di tuma precaucion basico, si bo no ta duna un hende un man, e persona aki no mester mishi cu su cacho of pushi tampoco,” PETA a declara.
E matamento di e pushinan ta un ehempel di e medidanan hopi biaha extremo cu China a tuma pa controla e virus, te hasta ora cu e averahe di infeccion ta permanece hopi mas abao cu esun di otro paisnan.
Ciere total, bistimento di tapaboca, testnan den cantidad grandi y averahe halto di vacunacion ta e causa di e control di e infeccionnan nobo.
Riba diaranson, China a reporta solamente 11 caso nobo local, 8 di nan den Harbin y 3 den e ciudad di Xiamen, ambos unda cu brote reciente a tuma luga.
China actualmente tin 949 pashent den tratamento pa COVID-19. E ta reporta cu 4,636 morto di e malesa a tuma luga, y tin 96,106 caso reporta.
Oficialnan di salud riba diaranson a bisa cu China a logra exitosamente vacuna 1 biyon hende di un populacion cu 1.4 biyon.
