Autoridad di China a rechasa pa renoba credencial di prensa di un reportero di Wall Street Journal cu sede na Beijing y a expulsa efectivamente e periodista cu a cubri ampliamente president Xi Jinping y partido comunista.

E expulsion di e periodista di Singapur, Chun Han Wong, a produci un luna despues di Wong y otro reportero a scirbi un storia detaya na un investigacion di Australia di un conexion di e primo di President Xi cu wega di alto riesgo, labamento di placa y sospecho di crimen organisa.

“Nos ta opone na e mala intencion di algun periodista extranhero di difama y ataca China”, Ministro di Relacion di Exterior di China a bisa. Den su declaracion el a agrega cu periodista asina ‘no ta bonbini’.

Dow Jones, di empresa WSJ, a bisa den un comunicado cu autoridad a nenga pa renoba credencial di prensa di Wong. Den e comunicado ta bisa cu e compania ta investigando pero no a duna detaye.

Wong, 33 aña di edad, cu ta na China for di 2014, a nenga pa duna comentario. Periodista extranhero cu sede na China mester credencial di prensa valido pa nan por renoba nan visa di periodista. Visa di periodista y carchi di prensa mester renoba un bes pa aña.

E rikesa di lider di partido comunista y nan famia ta un tema tabu pa hopi tempo. The New York Times, mescos cu Bloomberg a haya problema di visa ora nan a informa di e rikesa di famia di e Prome Minister na 2012, Wen Jiabao y Xi.

For di cu Xi a asumi su posicion, medio di comunicacion y luga di sociedad civil na China a confronta cu restriccion, Wong ta e di 6 periodista cu ta bandona China den mesun circumstancia for di 2013 segun club di coresponsal extranhero di China.

 

LEAVE A REPLY

Please enter your comment!
Please enter your name here