China ta pone prohibicion riba television contra celebridadnan masculino cu fisico un poco femenino

(AP) – China su gobierno a prohibi hende homber cu maneranan femenino di television, y a bisa tur canal di television pa promove un “cultura revolucionario,” un campanja cu ta aumentando pa por pone mas control riba di empresa, y sociedad y pa reenforsa un moralidad oficial.

President Xi Jinping a haci un yamado pa un “rehuvenacion nacional” cu control hopi mas fuerte di e partido comunista riba empresa, educacion, cultura y religion. Compania y e publico ta bao di presion cu cada biaha ta aumenta pa por alinia nan vision pa un China hopi mas poderoso y saludabel.

E partido a reduci acceso na e muchanan su acceso pa weganan online y ta purbando di descurasha loke nan ta mira como atencion poco saludabel riba di celebridadnan.

Canalnan di television lo mester “pone un fin absoluto na hombernan debil y cualkier otro estetica abnormal,” e regulador di television a bisa, usando un termino ofensivo usa pa hombernan cu caracteristicanan femenino “niang pao”, cual ta traduci literalmente na “scopet di muhe.”

Esaki ta refleha preocupacion oficial cu celebridadnan Chino, influencia pa e fisico un poco femenino di algun cantante y actor Hapones y Koreano, ta fayando den nan responsabilidad di encurasha e hombernan hoben di China pa ta suficientemente masculino.

E canalnan aki mester evita di promove “celebridadnan vulgar di internet” y admiracion di rikesa di e celebridad, e regulador a bisa. Na luga di esaki, e programanan mester “vigorosamente promove e cultura tradicional excelente di China, cultura revolucionario y e cultura social avansa.”

Xi su gobierno tambe ta poniendo mas control riba e industria Chino di internet.

El a lansa un campana anti monopolio, siguridad di datonan y otro accionnan di reenfuerso na companianan incluyendo wega y rednan social manera Tencent Holding, y e gigante den comercio di internet Alibaba Group cual ta empresanan cu e partido gobernante ta teme ta demasiado grandi y independiente.

E reglanan cu a tuma efecto riba diarason ta limita cualkier persona di menos di 18 aña di edad na 3 ora pa siman di weganan online, y ta prohibi hungamento di e weganan aki riba dianan di scol.

Trahadonan di wega ya caba a ser rekeri pa somete titulonan nobo pa aprobacion di gobierno prome cu nan por ser lansa. Oficialnan a haci yamado pa nan duna e weganan aki tema nacionalistico.

E partido tambe ta poniendo mas control riba celebridadnan.

Canalnan di television mester evita di pasa artistanan of celebridadnan cu “ta viola orden publico” of a “perde moralidad,” e regulador a bisa. Programanan tocante yiunan di e celebridadnan tambe ta prohibi.

Riba diasabra, e plataforma Weibo Corp. a suspende miles di cuentanan cu tabata fan club di algun grupo of celebridad, y cuentanan cu ta duna noticia tocante entretenimento.

Un actor popular, Zhao Wei, a disparce di plataformanan onlina di wak pelicula sin ningun explicacion. Su nomber tambe a ser removi di cualkier credito pa pelicula y programa di television.

Diahuebs su orden a bisa television pa limita e pago na celebridadnan y pa evita terminonan den contract cu lo yuda nan evadi pago di belasting.

Otro actor popular Zheng Shuang, a ricibi un boet di 299 miyon yuan, cual ta aproximadamente 46 miyon dollar siman pasa pa motibo cu su persona no a paga belasting, como un advertencia na otro celebridadnan pa ta un modelo positivo pa e hubentud.