Desde aña 2010, Chris Kross hunto cu Siegfried Hart a cuminsa cu e idea di tuma e musica tradicional di Aruba pa mescla cu otro ritmonan. Nan tabata haci di canticanan di jazz algo mas crioyo e tempo ey.

Kross ta un hoben musico cu a haci di e canticanan aki algo diferente y asina e rais a cuminsa, ora e tabata manda loke a haci pa Siegfried pa intercambia ideanan, cu te na e momentonan ey no tabatin un obhetivo.

Durante un biahe cu Kross a haci pa Hulanda di vakantie, el a bishita Siegfried y nan a cuminsa hunto un danza, cu manera tur hende ta conoce ta un ritmo slow. Nan a cambia esaki pa algo mas lihe, cosnan diferente cu nan a cuminsa haci cu instrumento y asina nan a crea e idea di ‘Krosshart Proyect’ hunto cu otro musico.

Kross a splica cu el a drenta den un competencia na Merca y el a gana prome luga. Durante esaki el a haya 8 ora pa utilisa un studio di grabacion y den e oranan ey a inicia cu e grabacion di un album, hinca e concepto den otro pa graba tur diesun cantica cu e album ta trece.

“Nos ta purba di experimenta y revoluciona e ritmonan”, Kross a declara.

Asina tambe el a expresa cu nan ta combina otro ritmo di Caribe, jazz, musica clasico, ritmonan di Brasil pa crea un sub-genero nobo, pa asina e generacion nobo por sigui cu e evolucion di e generonan. Esaki pa motibo cu e generacion prome cu Haart y Kross a haci esey caba y nan lo kier continua.

“Musica ta evoluciona cu tempo y esey ta parti di identidad di un pais, cultura ta lo cual ta identifica e pais .” Kross a bisa.

Loke nan kier haci ta pa graba otro album, pero tambe nan kier documenta full e proceso di e parti di composicionnan desde comienso te parti final. E documentacion aki ta bay ta un parti educativo cu lo mustra tur e diferente aspecto di e trabou di un musico.

Tocante esaki, el a splica cu na Aruba por ta conoci tres trabou so: toca, duna les y graba. Pero tin hopi otro aspecto di musica. Por ehempel un conductor, hende cu ta haci music terapy of compositor, areglista… asina diferente ramo di musica cu no ta conoci ainda na Aruba y nan lo kier duna conoce den documentario. Asina mes, el a informa cu despues di e album lo kier haci un concierto.

E banda ta conforma pa Jose croeze (bass), Lidrick Solognier (percusion), Siegfried Hart (bateria), Chris Kross (guitarista), Darwin Rogers (visual), Semi Chahmi (video) y Edjean Semeleer cu tambe ta forma parti di e team.

Ora nan cla cu e album – cu nan lo bay graba na Boston y Hulanda – apart di e concierto nan lo kier haci seminarionan y otro concierto pero pa basicschool, pa motiva y stimula e creatividad di e muchanan. No necesariamente pa nan haci musica, sino pa saca e parti creativo di nan mes.

Den e seminarionan, Kross a comenta cu lo kier splica kico nan ta haci precies den e parti musical di e album, pa motibo cu esey tin hopi estudio su tras pa por yega eynan.

Tambe el a informa cu desde un aña pasa tur di nan a cuminsa cu e proyecto, enfocando riba e parti di ‘experimentacion’ manera el a bisa pa motibo cu nan a ‘haci hopi experimentacion cune’.

Pa dia 12 di maart, Kross a expresa cu nan ta bay Merca y despues Hulanda pa cuminsa graba y si tur cos bay bon pa dia 20 di april e album mester keda cla.

Asina mes, nan lo kier haci un tour den islanan ABC pa presenta e album aki y tambe pa toca den festivalnan na rond di mundo.

Kross a duna di conoce cu nan a mustra e proyecto musical pa otro artistanan local, locual nan a haya un bon señal, pa motibo cu esaki ta un proyecto hopi importante pa e cultura di Aruba sigui cune. “Ami ta pensa cu e genero lo keda caminda e ta y no lo evoluciona, y asina poco poco ta bay perdi”, el a sigura.

“Musica ta pa un intencion semper, e parti di gosa y gusta ta importante, pero e parti di un proyecto asina, cu diferente genero, ta trece hopi consciencia den nos bida real”, Kross a señala.

Pa finalisa, el a laga sa cu nan tin un campaña di ‘GoFundMe’ pa hende por duna loke nan kier y tur donacion tin un prijs den cada categoria y ta haya algo bek, manera un les di e banda of un concierto, por ehempel.

.

 

 

LEAVE A REPLY

Please enter your comment!
Please enter your name here