Chrissy Teigen a bisa cu e y John Legend ta den ‘dolor profundo’ despues di perdida di nan embaraso, cual nan a anuncia den un desgarador post riba rednan social.
Teigen a skirbi cu nan tabata ‘coriendo auto bay cas for di hospital sin baby. Esaki no ta real’.
“Nos ta den shock y den e tipo di dolor profundo cu bo ta solamente tende di dje, e sorto di dolor cu nos nunca a sinti antes. Nos nunca a logra di stop e sangramento y duna nos baby e likido cu e tabatin mester, a pesar di saco tras saco di transfusion di sanger. Djis no tabata suficiente”, el a skirbi den su post diaranson laat, hunto cu un potret di su mes na yoramento riba un cama di hospital. Otro imagen a mustr’e y Legend afligi cu un clechi den su brasa.
Revelando cu nan a scoge e nomber Jack, e modelo y e musico a skirbi di nan amor pa nan yiu homber perdi, kende lo tabata nan di tres yiu. “Na nos Jack – mi ta asina sorry cu e prome momentonan di bo bida tabatin asina hopi complicacion, cu nos no por a duna bo e cas cu bo tabatin mester pa sobrevivi. Semper nos lo stima bo.”
Legend a retweet su post, agregando, ‘Nos stima bo, Jack’.
Teigen a anuncia su tercer embaraso na augustus. E tabata hospitalisa cu sangramento excesivo anteriormente den e siman.
Gradiciendo esnan cu a manda ‘energia positivo, pensamento y oracionnan’, Teigen a conclui: “Nos ta asina gradici pa e bida cu nos tin, pa nos babynan precioso Luna y Miles, pa tur e cosnan maraviyoso cu nos por experiencia. Pero tur dia no por ta yen di solo. Den e dia scur aki, nos lo lamenta, nos lo yora. Pero nos lo brasa y stima otro mas duro y sobrepasa esaki.”
