(AFP)—Chuck Norris, e artista marcial Mericano y strea di Hollywood conoci principalmente pa su rol den serie di television “Walker, Texas Ranger,” a fayece, su famia a anuncia diabierna. E tabatin 86 aña.
Norris a muri diahuebs mainta, segun su famia a bisa riba Instagram, despues di reportahenan di media cu e tabata hospitalisa pa un condicion cu no a ser revela mientras e tabata na e isla Kauai na Hawaii.
“Pa mundo, e tabata un artista marcial, actor y un simbolo di fortalesa,” e declaracion a bisa. “Pa nos, e tabata un esposo dedica, un tata y welo amoroso, un ruman increible y e curason di nos famia.”
Famia a bisa cu nan kier mantene detayenan di su morto priva, agregando: “por fabor sa cu e tabata rondona pa su famia y tabata na pas.”
Homenahenan rapidamente a cuminsa drenta.
“Henter Texas ta lamenta e morto di Chuck Norris. E no tabata solamente un campeon di arte marcial, icono di accion, y e unico Walker, Texas Ranger,” gobernador di Texas Greg Abbott a bisa.
“Mi curason y pensamentonan ta cu su famia. Nunca nos lo lubid’e,” strea di pelicula di accion Jean-Claude Van Damme a bisa.
Icono riba pantaya grandi
Naci na Ryan, Oklahoma, dia 10 di maart 1940, Carlos Ray ‘Chuck’ Norris a cuminsa practica arte marcial mientras e tabata sirbiendo den Air Force di Merca na Corea di Sur.
El a sali di Air Force na 1962 y a habri un studio di arte marcial na Los Angeles, unda el a haya su pasion den enseñanza y den dunamento di kick “roundhouse”.
Su debut como actor a bin cu un cameo den e pelicula di Dean Martin na 1968, “The Wrecking Crew.” Cuater aña despues, su pelea epico cu superstrea di kung-fu Bruce Lee den “The Way of The Dragon” a yuda Norris bira un icono riba pantaya grandi y chikito.
Despues, un serie di rol principal den pelicula di karate a sigui, for di un comando Mericano den “Good Guys Wear Black” pa e pelicula di horor y accion “Silent Rage.”
Norris vs Superman
Mientras su carera como actor a crece, el a bira un figura legendario den arte marcial, ganando seis campeonato mundial profesional di karate peso medio entre 1968 y 1974 y logrando fahanan preto den varios disciplina.
Na 1983, Norris a drenta den e rol di un ranger di Texas cu poco palabra cu ta lucha contra traficante di arma den “Lone Wolf McQuade,” cual a bira fundeshi pa e serie cult “Walker, Texas Ranger.”
E serie a dura ocho temporada y a genera hopi meme di accion, incluyendo un unda Chuck Norris y Superman a bringa, y e perdedor (Superman) a keda obliga pa bisti su jockey riba su trahe.
Exito di e ranger cu ta entrega golpinan fuerte a marca un cambio impresionante den bida di Norris, kende a crece como un mucha timido y no deportista, y cu “tabata soña di ta fuerte… pa duna golpi na su bullynan.”
Un Cristian evangelico, el a nace den un famia di tres mucha homber cria principalmente pa nan mama Irlandes despues di su divorcio di nan tata alcoholico.
E tin dos yiu homber cu su prome esposa Dianne Holechek, un matrimonio cu a dura 30 aña, y un yiu homber y un yiu muher cu su segunda esposa Gena O’Kelley.
Norris tambe tin un yiu muher for di un relacion durante su prome matrimonio.
Un Republicano firme, el a urgi su compatriotanan pa vota contra Barack Obama na 2012. Un aña despues, el a mustra su apoyo pa lider Israeli Benjamin Netanyahu den un video.
Diabierna, Netanyahu a yama Norris “un gran amigo di Israel y un amigo personal.”
El a agrega: “Chuck a trece arte marcial y calor di su caracter na miyones di hende rond mundo.”
Na 2017, Norris a recupera despues di dos paro cardiaco. Dos aña despues, el a keda envolvi den controversia ora el a bira e cara publico di compania di arma Glock, a pesar di un epidemia di violencia cu arma na Merca.
