Segun un reportahe di Reuters, tankernan ta para cera di un waf bieu di azeta den region occidental di Venezuela pa piki cargamento di crudo y sali for di e pais Sur Americano prome cu e fecha limite di 27 di mei imponi pa Merca, pa stop operacion y exportacion, segun dato y documento.
Venezuela, sanciona pa Merca, ta programa pa inaugura e luna aki exportacion di un grado nobo di crudo, Blend 22, pa atrae cliente hasta despues di expiracion di e licencia cu Washington a otorga na companianan na Merca, India y Europa pa transporta exportacion di azeta Venezolano.
Pasobra e grado ta un mescla di crudo produci pa compania estatal Pdvsa na su camponan occidental, exportacionnan mester ser manda for di La Salina, un terminal bieu y deteriora den costa di Lago Maracaibo, unda tankernan hopi biaha ta susha nan hull ora nan ta mara pa motibo di azeta cu ta leak for di tuberianan submarino. Barconan tampoco por carga mas cu 350mil bari di crudo den e area ey, pa motibo di e falta di dredging di Lago Maracaibo.
Mayoria di cliente di Pdvsa tipicamente ta evita La Salina, pero mientras e deadline ta acerca pa cumpradornan bay cu cargo Venezolano bao licencia Mericano, algun a tuma e riesgo pa carga eynan, cu a cuminsa impulsa retraso y un bottleneck di tanker wardando na Maracaibo, segun e documentonan y data di monitoreo di carga a mustra.
Reuters ta nota ademas cu, di como un decena di barco cu Chevron tabatin cerca di wafnan Venezolano e luna aki prome cu e cancelacionnan di cargo, cinco ta keda cerca di Aruba wardando instruccion, mientras otronan a ser manda pa piki cargo na otro caminda, segun datonan di barco di LSEG.
Pdvsa, M&P y Chevron no a responde inmediatamente na solicitud pa comentario.
Gobierno di presidente Nicolas Maduro a critica Washington pa reforsa sancion contra e pais, y a bisa cu e medidanan ta un “guera economico.”
