Un di e ganado di un di e proyectonan di Pitch Time como Best Youth Leader y Best Project Pitch Time 2021, Cindy Jansen ta un hoben di 23 aña cu a splica con su proyecto a bay den competencia y con Salud Mental ta importante den comunidad y specialmente pa hobennan y muchanan.

Den un entrevista na Bon Dia Aruba el a trece dilanti cu el a caba su estudionan na EPI den area di salubridad y servicio “Welzijn”, actualmente e ta traha y tambe ta duna bijles, pa loke ta trata e proyecto cu a gana den Pitch Time el a conta cu un par di persona a tuma contacto cune pa asina e por participa den competencia di algun di e tres proyecto cu tabata habri na unda nan tabata buscando un lider.

“ Mi a haya esun di Salud Mental mas interesante y mi sa cu nos pueblo tin mester di dje aworaki y e ora ey ma bisa, mi ta bay p’e”, Jansen a expresa.

El a bisa cu esaki ta algo cu basicamente a hala su atencion pa motibo cu e hobennan mester di dje y el a siña un parti di dje tambe durante su estudionan na EPI na unda cu el a haya sa con pa yuda den e parti di trabou social.

Su proyecto ta yama “Every Mind Matters” na unda nan ta duna sesion informativo y di ayudo na gruponan di hoben entre 13 pa 21 aña, tur diasabra nan ta reuni na YMCA na Dakota entre 10or pa 12or y mey pa asina hobennan por haya diferente actividad, papia cu e hobennan conhuntamente cu psicologonan cu ta yuda di manera boluntario di diferente departamentonan, “e ta simplemente cu e hobennan ta bin tur diasabra y sinta den grupo chikito di dies hende haciendo diferente actividad”, el a bisa.

Un proyecto cu cada un di nos a hinca nos curason aden sin realisa e reto duro cu nos tabata drentando. Hopi emocion pero tambe nos a siña conoce duna amor na bo prohimo. Saca un man di yudansa. Yora y hari cu bida di otro pero mas cu tur cos e satisfaccion di mira nos hobennan cu a busca un refugio cerca nos, SMILE.

Nan tambe a ser scogi den e 4 proyecto pa European Solidarity program, nan a priminti di haci nan maximo esfuerso pa sigui cursonan y pa asina skirbi nan proyecto pa ricibi e suma pa sigui cu e proyecto aki na Aruba.

Na banda di esey nan proyecto di Every Mind Matters a wordo scogi den e proyecto di Youth Exchange Program como Team Aruba cu e topico di Salud Mental, cu lo tuma luga na Dinamarca den zomer di otro aña, un reto completamente diferente pero nan ta bay p’e.

Den e sesionnan cu e hobennan Jansen a comenta cu nan ta papia di Salud Mental, e hobennan ta trece dilanti e problemanan cu nan ta pasando of cu nan a pasa aden cu te ainda ta afecta nan y nan ta papia di dje den grupo hunto cu e psicologo y otro compañeronan cu ta buscando un ayudo pa nan problema.

Jansen a comenta cu e parti mas erg cu el a yega di scucha di e hobennan ta cu tin algun di nan cu a yega di ranca nan cabey ora cu nan tin stress of tambe algun cu a corta nan mes cu tan solo 13 aña di edad pa motibo cu nan no tin un manera pa acerca na nan mayornan of e mayornan ta hopi streng cu nan, otro hobennan cu a perde nan tata y nan no por surpasa e situacion ey, tur esey ta hunga un efecto riba e hobennan.

Jansen a duna como mensahe pa e hobennan cu ta sinti nan mes cu algun problema of tin algun miedo pa acerca Every Mind Matters su sesionnan tur diasabra of manda un mensahe pa nan riba nan Facebook page pa asina haya informacion y nan lo keda anonimo, ademas e sesion ta totalmente gratis.

“Si nan no tin e confiansa den nan mayornan por ta nan tin e confiansa den un prima, of un amiga, purba di papia cu nan, no mester tin miedo, si nan no ta pasando hopi erg y solamente nan ta sinti nan mes su so door cu nan mayornan ta traha hopi, busca ayudo of bin cerca nos”, Jansen a manifesta.

Diasabra aki nan lo tin un actividad di ehercicionan y despues nan lo cera cu meditacion, “Aruba tin mester di mas iniciativa aki, e personanan cu ta yuda nos ta completamente gratis den nan tempo liber, nos hobennan tin mester di dje pasobra e comunicacion cu e mayornan cu pa algun motibo nan no t’ey ta algo cu ta kibra e hoben, mi ta sinti cu mayornan mes mester di un curso of algo pa siña compronde nan yiu, e comunicacion cu nan yiu ta lo mas principal cu e yiu tin mester”, Jansen a finalisa.

LEAVE A REPLY

Please enter your comment!
Please enter your name here