Pa hopi pashent cirugia hopi biaha ta keda un ingreep bastante grandi yena cu riesgo y hopi bez cu tempo largo pa recupera. Recientemente nos ta wak avancenan tecnologico traduci nan mes den hermentnan nobo pa ciruhano. Un di e hermentnan nobo aki ta Cirugia Robotico, unda e ciruhano ta usa un robot pa haci un procedura complica, cu minimo impacto riba e pashent den cuestion. Nos lo wak den e siguiente seccionnan cu tecnologia ta revolucionando e area di cirugia.
Cirugia robotico di curason
E operacion pa reemplasa e hartkleppen di e aorta of den curason, normalmente ta un procedura sumamente grandi y complica, unda mester habri full thorax di e pashent pa asina reemplasa e hartklep. E aña aki na Cleveland Clinic na Merca, a raporta mas di 4 operacion di ‘robotically assisted aortic valve replacement’. Den e procedura aki un incision chikito ta wordo traha na e nek di a pashent y cu e man robotico ta haci e procedura di reemplasa e aorta klep. Importante pa nota ta cu e pashentnan por a bay cas den 4 pa 6 dia despues di e operacion. E ta sumamente interesante pa wak con un ingreep operativo grandi asina awo por wordo completa cu un incision chikito via nek di un pashent.
Cirugia robotico completamente automatisa
Aunke e siguiente tecnologia ta mas o menos 10 aña den futuro, dus e no lo ta un perspectiva inmediato den hospitalnan rond mundo, nos tin cu toca e tema di Cirugia Robotico Completamente Automatisa. Esaki lo ta cu un robot hunto cu algoritmonan avansa di AI, lo literalmente haci full un operacion sin cu tin mester di ciruhano humano pa lidera e robot.
Aña 2025, debi na varios factor tin un scarsedad di ciruhano humano y esaki ta traduci su mes den lista di espera largo pa ingreepnan cirurgico, cu por tin consecuencianan tambe pa e salud di e pashent. E promesa di cirugia full automatisa ta cu den futuro lo por haci cuminsando cu ingreepnan rutinario chikito na un nivel di precision, gasto abou, y mas rapido cu lo ta posibel pa un sistema cu ciruhano humano.
Un ehempel ilustrativo di esaki ta un operacion pa kita un galblaas. Den un laboratorio na Johns Hopkins University na Merca a train un algoritmo di AI riba miles di videonan di operacion di galblaas. Den un setting experimental a laga e robot kita un galblaas di porco morto y esaki a bay sin ningun problema.
Awo obviamente un porco morto no ta un ser humano bibo cu tur su complehidadnan cu esaki ta trece cune, pero e ta previsualisacion di loke cu por bira posibel den futuro si tecnologia sigui avansa.
