Mundo ta cambiando rapidamente. Nos ta wak esaki den casi tur area di nos bida diario. Fo’i AI potente, pa robot antonimo cu por haci varios trabao, nos tur ta sinti cambio ta biniendo mas y mas rapido. Un area unda e promesa di AI & Robotica ta sumamente grandi ta den veld di medicina.
Un presion inmenso, di un poblacion embeheciendo, gasto medico subiendo, y lista di espera mas y mas largo, ta indicando cu mester cuminsa pensa “outside the box” pa resolve e problemanan aki den un manera socialmente aceptable. Aunke pa hopi e siguiente lo zona manera un episodio di “Star Trek”, esta Cirugia Robotico, pa varios lugar na mundo e parti “Star Trek” aki no ta nada nobo. Den e articulo aki nos lo duna un resumen breve over cirugia robotico, y splica dicon esaki ta bay bira un parti cardinal di futuro medico rond mundo, y tambe di Aruba.
Kico ta Cirugia Robotico?
Nos tur conoce ciruhano medico humano, pa hopi specialista na Aruba, e ta costa mas cu 13 aña di estudio pa bira un ciruhano. Y te hasta asina, como hende, foutnan medico ta surgi, simplemente pasobra un ser humano tin cierto limitenan cu no por wordo surpasa.
Cirugia Robotico awendia ta unda tin un robot ultra-precies cu por haci cirugia “minimally invasive”, pero cu te ainda ta bao control di un ciruhano humano. Door cu e hermentnan robotico ta hopi mas precies y fini, por haci operacionnan cu un minimo cortamento. En teoria esaki lo cumbini un pacient hopi, door cu lo tin menos chens riba complicacion, perdida di sanger, y menos dia den hospital. Esaki lo traduci su mes den menos sufrimento humano, y menos gastonan pa e sistemanan social di salubridad.
Mas cu 12 aña caba di data
Recientemente na 2024, a keda publica un meta-analisis grandi, unda 12 aña di data di mas di 230 estudio a compara cirugia robotico cu esun di un cirugia humano, pa operacionnan oncologico.
(Hentere estudio y tur su detayenan por wordo lesa via e siguiente citation: Ricciardi R, Seshadri-Kreaden The COMPARE Study: Comparing Perioperative Outcomes of Oncologic Minimally Invasive Laparoscopic, da Vinci Robotic, and Open Procedures: A Systematic Review and Meta-analysis of the Evidence. Ann Surg. 2025 May 1;281(5):748-763. doi: 10.1097/SLA.0000000000006572.)
Compara cu cirugia regular (open surgery), e uso di cirugia robotico a resulta den 44% menos complicacion medico. Tambe pacientnan tawata tin 21% menos chens di mester transfusion di sanger, y finalmente tabata keda 1.9 dia menos largo den hospital. Dus pa e grupo di pacientnan oncologico aki nos ta wak cu siguramente por tin beneficionan significante cu bastante data su cientifico su tras.
Star Trek: Cirugia Robotico completamente autonomo
Na juli 2025, e hospital renombra Americano John Hopkins a publica resultado di un experimento unda un robot cirurgico a saca un galblaas for di un porco. Kico ta haci esaki remarcabel cu esaki a wordo haci completamente automatisa, sin ningun ayudo di un ser humano.
(Por lesa mas di esaki den e siguiente press release: Robot performs first realistic surgery without human help | Hub)
Segun publicacionnan den por ehempel Science, ta indica cu un robot cirurgico por wordo getrain riba miyones di videonan cirurgico, y cu esaki lo dura solamente un par di siman pa luna. Compara esaki cu 13 aña pa train un ciruhano humano y nos por wak varios bentaha.
Combina esaki cu e data di menos complicacionnan medico, y tambe cu robotica & AI ta sigui avansa mas y mas lihe, e ta solamente un cuestion di tempo, pa ora cu cirugia wordo automatisa por completo, cual lo tin beneficionan inmenso pa sociedad henter.
