Gobierno di presidente Venezolano, Nicolas Maduro a haci un donacion di 500 mil dollar pa e ceremonia di instalacion di presidente Mericano, Donald Trump. E donacion aki a wordo haci door di Citgo Petroleum na Merca, di cual e compania madre ta PDVSA di Venezuela. E noticia aki divulga pa e corant Venezolano El Universal a bini for di Associated Press pa nan abonadonan.
E informacion ta indica cu e donacion aki ta aparece registra riba e lista di e companianan corporativo divulga pa e comision encarga cu e ceremonia di huramentacion di e mandatario Trump. Igualmente nan a divulga cu recientemente Pdvsa a ofrece un participacion di casi 50% den Citgo como garantia pa ricibi un prestamo di 1.500 miyon dollar di parti di e compania Ruso, esta Rosneft.
E acuerdo aki a bira un motibo di critica ya cu e lo por crea condicion pa asina e mandatario Ruso, Vladimir Putin lo tuma control di e control di e maneho aki. Actualmente for di luna di october di aña pasa, Citgo ta huur for di e compania estatal Refineria di Aruba (RdA), e infrastructura di e refineria na San Nicolas, cu mester drenta den e proceso pa upgrader pa procesa crudo pisa.
