Citgo su berdad a cuminsa sali

Citgo su berdad a cuminsa sali. Loke tabata anticipa pa basta tempo caba, pero a keda silencia pa e gritonan di alegria pa e contracto firma cu gobierno di Aruba y e empresa estatal nobo Refineria di Aruba NV, awor ta saliendo na luz di dia. E medio di comunicacion aki regularmente tabata trece noticia tocante e desaroyonan menos faborabel pa e empresa aki y pa su propietarionan, cu ta dos holding na Merca y  PDVSA mes. Kico ta pasando exactamente? Y kico por ta e consecuencianan pa e proyecto di rehabilitacion na Aruba? Nos ta purba di contesta e dos preguntanan aki lo miho posibel.

E caso di tuma hipoteca, miho dicho empeña e compania Mericano cu tin propiedad y cu por ser uza como ‘collateral’ den fiamento di placa no ta di ultimo tempo so. Despues cu un par di aña pasa PDVSA y gobierno Venezolano kier a bende Citgo Petroleum Corporation y no a logra, nan a bin riba e idea pa tuma mas tanto posibel prestamo riba e compania, pa pasa esaki pa PDVSA y gobierno, como dividendo. Prome a opta pa pasa cierto ‘assets’ di Citgo pa e holding Citgo Holding LLC pa nan por uza como collateral pa prestamo. Den ultimo lunanan di e aña aki, ora PDVSA a trata di convence tenedo di bono di 2017, pa cambia esakinan pa bono di maduracion na 2020, nan a hipoteca caba 50,1% di e accionnan di e compania. Cu esey ya caba e autonomia pa actua den e empresa manera Caracas ta haya ta bon a bira mas dificil.

Awor cu a bin sali na cla cu e restante 49,9% di e accionnan ta poni den man di Rosneft como garantia pa un prestamo urgente di US$ 1500 miyon, por bisa cu tanten cu e propiedad aki ta sirbi di garantia, PDVSA su poder den e empresa ta limita.

Kico ta e consecuencia pa e proyecto na Aruba? Pa cuminsa ta bon pa repasa e structura interno na cual Citgo Aruba Refining NV ta pertenece. Citgo Aruba ta un subsidiario directo di PDV Holding LLC na Merca, cu riba su turno ta propiedad di PDVSA. Citgo Petroleum Corporation LLC, e compania cu propiedad berdadero, ta propiedad di Citgo Holding LLC, cu ta propiedad di PDV Holding LLC. Citgo Petroleum no ta ni ruman directo di e NV na Aruba. Na Aruba no a duna mucho atencion na e relato di prensa cu Citgo Petroleum a saca un dia despues di e acuerdo firma na Miraflores na juni, unda nan ta bisa categoricamente cu nan ta solamente envolvi cu asistencia tecnico. E financiamento lo mester a tuma luga externamente. Despues a bira conoci cu ‘Citgo’, sin specifica cual di nan, lo a pidi PDVSA un prome prestamo di US$ 100 miyon pa cuminsa e proyecto na Aruba. Te awor e mundo financiero no a tende nada mas di esaki.

En todo caso awor a bira bisto cu e compania Citgo Petroleum Corporation su mannan ta mara, mas ainda cu prome pasobra PDVSA, y gobierno Venezolano, no tin manera pa dirigi e empresa na nan antoho sin derecho di voto den asamblea general di e compania. No mester lubida ademas cu na Merca tin legislacion masha fuerte contra mal maneho intencional di un compania. Tuma accion cu por ta dañino pa existencia di e entidad Mericano aki por tin consecuencia serio pa esunnan cu ta haci esaki. Ta esaki ta loke e gerencia Mericano regularmente mester recorda e ‘piratanan’ Venezolano pasobra nan cu ta residencia na Merca ta esunnan cu ta core riesgo.

Den e contexto aki ta remarcabel tambe cu desde e firmamento di e acuerdo,  na Venezuela no a aparece nunca mas un palabra tocante e proyecto na Aruba. Asina poco prioridad e tin pa PDVSA y pa gobierno Venezolano? Of por ta cu nan ta mir’e como un bon proyecto, pero awor aki nan tin otro dolor di cabes pa atende? Manera paga nan proveedornan internacional y local?

Na Aruba mes ta existi un NV nobo cu no tin, asina leu cu nos sa, ningun tipo di propiedad pa sirbi como ‘collateral’. E holdingnan tampoco tin espacio financiero conoci, y PDVSA mucho menos. For di e articulo acompañante nos por conclui cu e accion di duna e empresa Ruso Rosneft e sharenan restante como garantia mester tabata un ultimo acto di desesperacion, tumando na cuenta cu solamente un poco mas cu mita di e placa a yega cuenta bancario na Venezuela.

Ademas na Aruba te awor no tabatin mucho actividad. Esey a keda hustifica cu e argumento cu ta bay tuma algun tempo prome cu e analisis completo tecnico keda cla, pa por sa exactamente kico e ‘draaiboek’ ta bay ta. Ta zona creibel, pero pakico anto tanto drama pa urgi tur hende core bay registra na Citgo desk, pa no perde e oportunidad. Esey ta simplemente parti di e ‘show berde’ cu nos a custumbra cu ne caba? Palabra ta na esunnan cu a hiba deliberacion cu e companianan Citgo y PDVSA. E anterior asesor principal a bira ministro pero igualmente por duna claridad.