E siman aki riba rednan social, un ciudadano di inicial P.d.P. a comparti un suceso shockeante den cual un persona a subi su auto y ataca e chauffeur y su yiu di 16 aña. Loke a causa un reaccion fuerte entre comunidad ta cu e persona cu a comete e atake a keda den libertad casi inmediatamente, poniendo den evidencia e debilidad di nos sistema legal pa protege ciudadanonan.

Den su post, den cual el a tag minister di Enseñansa, Hubentud, Innovacion, Relacionnan di Reino y Deporte, Gerlien Croes (Futuro) como tambe minister di Husticia, Integracion y Transporte Publico, Arthur Dowers (AVP), P.d.P. a cuminsa bisando cu su intencion den comparti e relato di loke a sucede tabata “pa conscientisa, informa, preveni y [analisa] na unda Pais Aruba lo kier yega cu e topico di ‘adictonan double trouble.’”

Segun P.d.P. a conta, tabata diasabra di siman pasa, 23 di augustus, cu e tabata den auto cu su yiu di 16 aña di edad, riba caminda di Cas Paloma pa bay Pos Chikito. Na momento cu tabata na e crusada entre Flamingostraat y Cas Paloma, el a tuma nota di un señora cu tabata cana cubri na sanger. El a conta cu como bon ciudadano, el a pidi su yiu yama polis na number 100 pa informa di loke a mira. “Y ami riba un speed abao sin pensa lo bay pasa den algo cu lo cambia nos bida,” el a agrega. “E [señora] aki pidiendo ayudo a bin riba mi auto bati riba mi hood histerico. Susha full e auto dilanti na sanger,” e persona a conta.

Mas impactante, prome cu e persona a haya chens pa lock porta di e auto, e señora en cuestion a pusha e yiu di 16 aña y a drenta den auto. P.d.P. y su yiu mester a lucha pa e señora baha, keda pusha pa sak’e for di auto, “mientras e tabata purba pa coy stuur,” y mientras P.d.P. tabata “grita adres na telefon cu central” di polis. Segun P.d.P., e señora “tabata de remate.”

Eventualmente e mama y yiu a logra saca e señora for di auto, pero prome cu a haya un oportunidad pa cera e porta, e señora a habri e porta di parti patras di e auto y a drenta back, “cu tur desbentaha pa ami y mi yiu.”
A surgi un lucha entre e tres persona den e auto, y despues e señora a “pasa patras di mi, pasa over di mi bringa cu mi pa e stuur. Mi a manda elleboog den su direccion pa por a [libra di dje]. Y mi yiu tambe bringando cune. Tur esaki coriendo.”

P.d.P. a conclui di e situacion aki cu intencion di e señora “tabata hopi serio pa haci nos daño.” Segun el a conta, cu hopi esfuerso y despues di un lucha largo a logra saca e señora for di auto, pero cu na e momento ey, el a core bay cu tas di trabao di P.d.P. “Di leu ta wak con e ta zwaai mi tas den mondi.”

E señora, despues di henter e atentado, segun P.d.P. a conta tabata comporta su mes di un manera fuera di control. “Riba full e caya aki di Flamingostraat e la dal varios auto di hende coriendo. E la drenta propiedad. Mientras e tabata grita y zwaai.Sin sa ki destruccion e la causa caba prome cu e la ataca nos den nos auto.”

Finalmente, patruya K-9 a presenta na altura di Kolibristraat, y “cu hopi tactica un miembro di K-9 y otro mas polisnan a manda e señora aki abao.” P.d.P. a conta cu tabatin hopi testigo (“full Simeon Antonio”) observando loke tabata tumando lugar, y na e momento ey, e señora cu a causa henter e suceso a bisa nan pa filma e situacion, “con polis ta dal mi.” Autoridadnan a aresta e persona y a bay cune den van di aresto.

Esaki a laga P.d.P. cu sanger na su auto, su persona y su yiu. El a bisa tambe cu su yiu a haya trauma, y e mes su presion a baha, su famia a spanta y henter e suceso a causa conmocion den e bario. Ademas, un negoshi a keda destrui pa e persona.

Segun P.d.P., e señora en cuestion “lo ta bao influencia di droga, medicamento pa su trastornonan mental”, cu ta e motibo pakico el a denomina e persona aki como ‘double trouble’ den su relato.

Despues, P.d.P. a bay warda di polis, unda mester a djis duna nan dato y despues nan lo haya un yamada pa bay entrega keho. Sinembargo, ta te despues di merdia riba diadomingo a haya un yamada pa pasa dialuna pa haci denuncia di tur loke a sucede. Pero pa shock y sorpresa di P.d.P., ya pa dialuna, prome cu el a bay entrega keho, e señora ya tabata back riba caya, segun P.d.P. pa motibo cu e tin malesa mental.

Esaki a causa molestia y preocupacion pa P.d.P. “Ley ta proteha nan. Dus cu otro palabra, nan ta vogel vrij. Nan por haci kico cu nan kier, usa droga, desgracia bida di otro, y no tin nada pa para nan.”
Pa loke ta e victima, “victima lo keda victima” y “keda cu un sentimento di impotencia, rabia.” P.d.P. a bisa cu na momento di e suceso nan tabata spanta, pero con e caso a desaroya a transforma e sentimento ey den uno di rabia. “E señora aki ta un menasa pa comunidad y mi bario. E ta los eyfo. Ken lo ta su [siguiente] victima?”

En conclusion, P.d.P. a urgi pa Aruba “bin cu curatela obligatorio! Ministerio Publico mester lanta di winterslaap y gara e toro aki na su cacho. Parlamento stop di haci comedia y habri wowo y traha riba ley!”

Tambe e tabatin conseho pa otro ciudadano: “Abo cu ta riba caminda. No para ni pa bo spirito. Wak pa bo auto ta gelock!”

Bon Dia Aruba a dirigi pregunta na vocero di Polis, Sra. Liliana Rasmijn, pa puntra si loke P.d.P. a conta riba su rednan social ta exactamente loke a sucede segun polis, y si ta berdad cu a laga e señora cu a comete e atake den libertad mesora pa motibo di su salud mental. Te ciere di e edicion aki, no a ricibi un contesta.

Entre tanto, e relato di P.d.P. a causa hopi conmocion riba rednan social. Mayoria ta comparti situacionnan similar unda a laga un sospechoso sali mesora despues di un atake, cuestionando e efectividad di sistema legal pa trata e casonan aki. Usuarionan a comparti diferente tip pa seguridad, manera semper core cu auto na lock, no para pa niun hende, y no confia cualkier persona.

Otronan a comenta tocante e aumento den casonan di problema di salud mental, cu un usuario, J.B., kende a bisa di ta traha den e sector, indicando cu nan ta premira cu e cantidad di caso asina lo “triplica” den “menos cu un aña,” dunando asina un advertencia fuerte na autoridadnan. Hopi tabata exigi introduccion di curatela pa personanan cu problema di salud mental.

Tambe a discuti riba e hecho cu no por obliga un persona pa ricibi tratamento psicologico, loke ta haci dificil pa yuda e hendenan aki y ta laga e resto di comunidad den peliger di episodionan asina, unda un persona sufriendo di un crisis di salud mental por bira un peliger pa otronan of pa su mes. Ta solamente den cierto caso y bao cierto condicion cu por pone un persona bao curatela cerca un psikiatra, pero esey ta hopi selectivo y pa casonan hopi extremo.

Entre tanto, ta recomendable pa ciudadanonan revisa nan practica di seguridad riba caya y caminda pa protege nan mes.