Minister di Medio ambiente y Naturalesa, Ursell Arends no por a haci nada pa evita cu e tirenan riba dump a pega na candela. Asina el a bisa e ciudadano y activista mr. Anouk Balentina na Bestuurskantoor na momento cu e huma preto di dump tabata fuerte y prominente riba mita di Aruba.

Balentina a bay cu su yiu, no como activista, sino como mama preocupa mirando cu ambos yiu ta sufri di asma y tabata kier pa papia cu Minister di Husticia y Asuntonan Social Rocco Tjon pa haci apelacion riba e derecho di un bida adecuado pa su yiunan. Esey tabata e momento cu a yama Minister Arends kende a bis’e cu e no por a haci nada pa evita e candela di e tirenan. Aki mr. Balentina a cord’e cu el a manda adverti cu e acumulacion di tire por crea e peliger y hasta a comunica cu e Minister prome cu e candela pa hala e tirenan di dump pa evita cu nan por pega na candela. Te ayera tardi laat, ainda e area tabata produci huma cu tabata keda colga riba e area.

Minister Xiomara Maduro y instigacion contra Balentina

Pa Anouk Balentina sinembargo, tabata duro pa a lesa un comentario riba Facebook di parti di Minister di Finanzas Xiomara Maduro, kende a haci un yamada pa no kima e tirenan ya cu e ta nifica gasto pa pueblo di Aruba. Segun Minister Maduro, cu cada candela, Gobierno lo mester paga daño di perhuicio na un balor di 5450 florin.

Y tabata e comentario aki cu a irita e activista kende berdad a lanta un caso sumario contra Gobierno y a gana e derecho pa exigi un dwangsom, esta un suma cu Gobierno mester paga, como un medida pa forsa autoridadnan pa actua. Pero e dwangsom, e 5 mil florin no ta pa daño cu Balentina a sufri, mirando cu e placa mester bay pa Cruz Cora. E 450 florin ta e gastonan di Deurwaarder cu mr. Balentina mester paga adelanta prome cu e funcionario bin haci su evaluacion di e situacion y mira si ta cumpliendo cu decision di Corte of no. “Minister Maduro ta usa e argumento di daño di perhuicio pa crea e impresion cu ami ta haya e placa. Ami mester paga e Deurwaarder adelanta e 450 florin, sino e lo no bin. Y suma cu Gobierno mester paga ta un tipo di ‘schrikeffect,’ esey ta e meta en todo caso, pa nan cumpli.”

Den concepto di Balentina, ta mustra comosifuera Minister Maduro kier confundi pueblo, despista hende y trece informacion cu no ta cuadra, y locual e Minister a logra ta for di momento cu el a skirbi e opinion aki riba su Facebook, mesora Balentina a haya atake y insulto hasta di hende di bario, cu e kier enrikece su mes cu e candelanan na dump. “Ta net lo contrario. Ami mester saca placa di mi mesun saco, placa cu mester bay pa mi yiunan, a pesar di ta pasando den tempo dificil. E Minister a purba instiga pueblo contra mi, door di bisa algo cu no ta berdad. E placa na final ta bay pa Cruz Cora cu ta yuda pueblo. Si ta bisa cu ta algo malo pa cobra e dwangsom, anto Gobierno mester asumi su responsabilidad y percura cu no tin e candelanan aki, ya cu nan ta malo pa pueblo.”

Carta Tweede Kamer

Mientrastanto mr. Balentina a manda carta pa miembronan di Comision Permanente pa Asuntonan di Reino di Tweede Kamer y ayera miembro di Tweede Kamer pa D66 a reacciona puntrando si tin reaccion for di Parlamento di Aruba riba e candela di tirenan. Tambe Wuite a puntra con e organisacion di habitantenan ta funciona y si a expresa keho y preocupacion di e caso.

En todo caso, mr. Balentina a informa e comision cu e dump ta produci aire toxico cu a keda plama den e bario, cu concentracion riba un area designa como area natural protegi mirando e cantidad di mata di mangel.

Den su carta ademas, Balentina ta bisa cu Gobierno di Aruba ta papia palabra bunita, cu ta bay atende cu e problematica di dump, pero cu ta parce di ta haci net lo contrario. Consecuentemente, e, como ciudadano a acerca tur e autoridadnan nacional incluso oficina di Gobernador pa pidi ayudo y solucion pa e problematica. Pero cada instancia ta mustra dede riba e otro. Y pueblo ta keda na caya.

Banda di esey, Gobierno no a tin regla y regulacion riba medio ambiente, ni exigencia di calidad di aire, desperdicio y awa sushi, cu ta na interes di e habitantenan. Di e forma aki Gobierno, segun Balentina ta cubri su mes ya cu e ta bisa di no ta actua contra ley. E toma di accion concreto pa salvaguardia salud, bida y medio ambiente ta dura mucho largo. E ley riba medio y procesamento di desperdicio di Aruba ta hopi limita, sigur si compara cu esun di Hulanda y no ta dirigi riba e problematica di sushedad na Aruba y sigur no dump.

Derecho humano y kibra apatia na Aruba

E peticion di Balentina na e Parlamentarionan Hulandes ta pa nan asisti Aruba pa percura cu Gobierno ta atene na derechonan humano y di mucha cu ta stipula cu mester brinda un bon calidad di bida y derecho di bida. E situacion di Parkietenbos ta muestra di un negligencia largo y structural di parti di Gobierno di Aruba. E ciudadano a apela riba e funcion di garantia cu Statuut ta brinda y sigur si ta trata e kiebro riba derecho humano. Mas ainda, Balentina ta urgi e Parlamentarionan Hulandes pa yuda kibra e apatia politico cu ta existi na Aruba, cu ta locual ta stroba cu esnan local cu tin e conocemento por saca afo e causa y peliger di e problematica aki y di forma aki, stroba cu tin accion positivo pa para e peligernan.