Ayera mainta un ciudadano di nomber Giovanni Arendsz a trece dilanti un inkietud pa loke ta trata atencion medico pa habitantenan di Aruba. El a conta su historia y e solicitud cu e ta haci tanto na Gobierno di Aruba como AZV pa mehora e servicio medico den e isla.
Arendsz a relata cu diamars ultimo den oranan di atardi el a bay na e centro medico ImSan ubica na San Nicolas cu su yiu cu tabata malo e dia ey, aunke el a señala cu personal di e luga a atende su persona y si yiu di un bon manera, e nivel humano y comunicacion tabata tremendo pero a surgi un detaye, el a yega 6.30 di atardi na e luga aki cu su yiu y cuater ora despues ainda su yiu no a wordo atendi pa un doctor.
“Ma bay puntra kico tabata pasando, nan a bisa mi: ‘nos ta hopi druk meneer, un dokter so tin y e tin cu handle cu tur e situacion cu meneer ta wak rond’, a pasa cuatro ora y ainda nada, mi a ripara cu esunnan cu tabata na warda a bay cas y esunnan cu a subi warda a drenta, mi tabatin cuater ora wardando, un dokter so tin y no tin suficiente personal, esaki no ta e ImSan cu mi ta conoce, e trato tabata bon pero e problema tardansa di cinco ora pa atende un mucha cu tabatin kentura y dolor”, el a expresa.
Ademas di esey, el a bisa cu e tin un e tin un verwijsbrief na ImSan pa su wowo cu el a entrega aproximadamente cinco luna pasa, ora el a yama e assistent di e dokter el a scucha “meneer kico bo kier pa nos haci? si meneer kier yama januari of februari pasobra e lista ta asina yen cu pa april di otro aña ainda no tin luga”.
Arendsz tambe a papia di AZV unda el a puntra kico ta pasando cu e dokternan cu e isla mester, “nos ta tende tur loke tin di haber cu medidanan cu ta keda subi, corta de AZV, nos tin cu paga cierto remedinan, mi no ta akinan pa critica, mi ta akinan pa comparti y puntra te na unda a nos como ciudadano tin cu sinta y warda pa e detaye aki, tin un minister concerni cu mi tin cu dun’e un aplauso pa e parti turistico cu ta bayendo maraviyoso, pero si bo ciudadanonan no ta bon cuida ta con nan ta bay cuida e turistanan?”, el a puntra.
Segun el a señala, tin falta di mediconan unda ciudadanonan tin cu paga tur luna for di nan salario pa asina por haya atencion medico pero ora yega na balie pa puntra riba su verwijsbrief el a haya como contesta cu nan ta bay yam’e na maart di otro aña pa wak si ainda tin cupo pa den juni y juli por atende cu su wowo debi na e demanda asina halto cu tin.
“Esunnan cu tin manera pa subi avion por bay pero kico ta para cu nos seguro? Minister Oduber nada en contra di bo mi ta mira e lucha cu boso ta haciendo pa mehora cierto cosnan den nos comunidad pero mi ban focus riba e motor principal cu ta anos como ciudadano, nos salud pa nos por duna turismo e atencion”, Arendsz a sigura.
E preguntanan ta sigui keda den aire, manera el a expresa, y a puntra si lo haya ayudo, ImSan y Hospital Dr. Horacio Oduber pa su persona ta keda den e top 1, “pero pakico tin cu warda riba un emergencia? Ta duro con e dokter ta lucha pa yuda e hendenan cu a drenta cu emergencia pa cu presion halto, sin conta tur esnan cu tabata sinta pafo, a mi mester a hiba mi yiu cas pasobra e mucha no tabata por mas”, el a declara.
Sinembargo, su dokter di cas a atende cune y el a haya un remedi segun Arendsz a señala, el a insisti cu e no a haci e conferencia di prensa aki pa apunta dede riba ni un hende ni riba e centro medico pero ta existi incidentenan cu ta pasa.
Su sugerencia como ciudadano ta cu mester mehora e calidad di cuido medico, “nos ta neglishando nos propio ciudadano, pero ta falta mediconan pa duna atencion unda tur luna tin cu paga impuesto, mi ta espera cu nos por mehora, e ta un detaye chikito pero e ta simplemente pa pidi por fabor na nos minister concerni y tambe na departamento di AZV pa nos por mehora e calidad di cuido medico”.
Diamars ultimo su decision final tabata pa bay cas y no bay te hospital pabou pa sinta warda mas tempo y bis’e cu su yiu mester a bebe paracetamol, segun el a conta.
“E problema no ta e trahado tras di e balie, e problema ta e limite di loke nan ta haya opdracht di AZV”, el a finalisa.
