Un ciudadano a acerca Bon Dia Aruba pa conta di su experiencia, como cliente di un compania na Aruba cu ta brinda servicio di transporta carga, den e caso aki for di Merca pa Aruba, y trece dilanti no solamente e falta di e compania den para responsable pa su eror, sino tambe e preocupacion cu e situacion aki a trece dilanti pa cu e modus operandi den departamento di Douane cu ta traha cu e companianan similar.
Manera por ta un custumber pa tur hende, mi ta pidi varios diferente articulo online, sea paña, accesorio, sapato, tas, en fin, un variedad di cos pero manera posiblemente hopi di nos sa, aki na Aruba nos no tin e facilidad di haci pedido directamente for di afo y cu nan ta yega nos porta di cas, pues nos ta haci uso di servicionan cu ta facilita e traida di e pedidonan aki. Esaki ta e motibo dicon mi a cuminsa haci uso di e servicionan di e compania aki, ken ta ricibi mi pedido of paketenan na Merca, y ta trece esaki Aruba.
Den comienso, e servicio cu e compania aki tabata plasentero, aunke cu algun aspecto cu no tabata deseabel. Por ehempel, e paketenan tabata tuma demasiado tempo pa yega, a comparacion cu e tempo cu despues mi a haya sa cu otro companianan ta tuma. Sinembargo, pa motibo cu en berdad no tabatin motibo di peso pa cambia di compania, mi a sigui usa nan servicio. Mi a bira un cliente bastante frecuente, usando nan servicio cu un frecuencia rasonable pa considera mi mes un bon cliente di nan.
Poco poco nan servicio a cuminsa deteriora y empeora. Un di e prome cosnan cu mi a nota, ta cu a pesar di e schedule cu nan tabata bisa cu nan ta opera cune, e tempo di espera pa ricibi mi pakete no ta cuadra cu esey. Por ehempel, nan ta bisa cu tur diamars e barco ta sali for di Merca, pues si bo pakete a yega prome cu esey, pa diabierna e ta yega Aruba, y e siguiente siman bo por hay’e. Awo, den varios ocasion mi a haci mi pedido y esaki ta entrega cerca nan prome cu e diamars siguiente, sinembargo toch semper mi ta haya mi mes ta warda te hasta lunas pa haya mi pakete aki na Aruba, y ainda ora esaki yega Aruba, nan ta tarda tambe pa saca esaki for di Douane.
Mi kier menciona cu ami no ta e unico cu ta haci uso di e servicio di e compania aki, mi ruman, mama y demas familiarnan tambe tabata haci uso di e compania, pero poco poco a cuminsa tin mal experiencia y a stop di haci uso di nan. Por ehempel, parti di nan servicio ta como un sucursal di un compania di Merca aki na Aruba, sinembargo e servicio di e departamento aki cu mi ruman a usa, tambe a laga di desea, cobrando mi ruman un cifra sumamente halto pa un articulo di segunda mano cu el a ricibi como regalo. Ora nan a yam’e pidi’e un invoice, el a splica cu tur detaye cu e ta un regalo y no un compra, pues no tin invoice, e ta algo cu un persona a manda p’e. E empleado a insisti cu sin invoice, Douane mes ta dicidi e balor di e producto y ta cobra a base di esey, pues mi ruman a haci su mayor esfuerso pa haya e invoice di e laptop cu a ser cumpra 2 aña prome, y a manda esaki. Toch, na final di dia, Doune mes a dicidi e balor di e laptop y a cobra como si fuera un laptop nobo. Ora mi ruman a bay reclama, e compania a bisa cu mester a avisa esaki prome cu Douane dicta e balor y cu no por haci nada mes, siendo cu ya caba for di comienso a splica cu luhos y detaye ki tipo di pakete esaki tabata.
Den mi caso, ora mi a haci mi ultimo pedido cu nan adres na Merca, despues di varios decepcion y di dicidi cu mi lo duna nan un chens, Amazon a parti di pedido den dos caha. Na momento cu mi a mira cu 1 caha so a keda entrega y mi a haya notificacion cu esaki ta na caminda for di e compania, inmediatamente mi a yama y mi a informa cu mi tin 2 caha y si ta posible pa warda e di dos caba pa mi por ricibi tur dos hunto y saca tur dos hunto, asina mi ta paga un solo biaha e tarifa cu nan ta cobra pa e proceso.
Mi a haya e contesta cu si ta posible y cu nan lo haci esaki, pues mi a keda trankil y mi a warda pa e siguiente notificacion. Ora mi a haya e notificacion cu e pakete ta cla pa busca, mi a bay cerca nan pensando cu manera nos a palabra, tur dos pakete ta hunto y mi ta paga un solo biaha. Ora mi a paga, mi a controla e recibo y e tabata dicta cu tur articulo cu mi a pidi ta presente y te hasta cu e douane waarde dicta. Pues claramente, mi ta asumi cu tur cos ta den e caha cu nan a entrega na mi persona. Lamentablemente, esaki no tabata e caso, y nan a cobra’mi pa tur dos caha, como si fuera cu tur cos a yega hunto, pero mi a ricibi un so. Na momento di trece esaki na nan atencion, mi a ser bisa cu nan tabatin problema cu algun pakete cu a keda pega na Merca, y tampoco nan no por a duna un contesta cla di unda mi pakete ta.
Na final, mi mester a warda pa e otro pakete y toch paga un biaha mas pa nan proceso, cual mi ta compronde, na final di dia nan a haci nan trabao. Sinembargo loke a causa disgusto, ta e hecho cu atrobe nan a cobre douane waarde y demas tarifa di e articulonan cu ya caba nan a cobra y mi a paga anteriormente. Un biaha mas mi mester a bay cerca nan y splica cu nan ta cobrando mi dos biaha e mesun cos, y despues cu inicialmente e empleado a simplemente contesta cu ‘si, ta asina e ta’, a bin resulta cu berdaderamente nan a haci un fout y no mester cobra tur esey atrobe y cu nan lo debolbe e placa.
Awo, 2 luna despues, te ainda mi ta wardando pa nan debolbe e placa. Por mas cu mi ta yama, puntra, y corda nan, cada bes e contesta ta ‘e ta den proceso’, y ultimo biaha nan a hasta bisa ‘mi ta make sure pa awe mes manda e placa,’ pero te dia di awe, ainda mi ta wardando.
E ciudadano a comparti cu e situacion ta fastioso, no tanto pa e placa, sino pa motibo cu “e compania ta nenga di para responsable pa un fout cu nan a comete. Mi kiermen, mi ta compronde cu bo ta druk y mi tin cu warda algun dia, pero ya nos ta bayendo na dos luna, e ta un fout cu boso a comete, y ainda boso no por compensa esaki? Boso no por simplemente debolbe placa cu boso mes a cobra eroneamente?”
Ademas di cuestiona e habilidad den por para responsable pa su mesun erornan, e ciudadano a trece dilanti tambe cu esaki ta pone den duda e seriedad y profesionalismo cu cual nan ta traha y douane tambe. E ta splica cu “con por ta cu douane ta pone balor riba y cobra pa algo cu no ta nan dilanti? Paso con por ta, cu bo ta cobrando douane waarde pa algo cu no ta ni sikiera den e caha, e ta den un pakete cu a keda na Merca. Esaki ta duna e impresion cu nan no ta berdaderamente pendiente di kico nan ta controlando y lesando e invoice bon. Esaki ta laga porta habri pa situacionnan aki, of te hasta pio, sucede.”
E situacion ta uno cu ta problematico, di e banda unda si companianan no para responsable pa erornan cu nan comete, e consumidor mester carga cu e perdida y consecuencianan cu esaki trece y di otro banda, e ta causa preocupacion y ta pone duda riba e practica cu ta ehecuta na momento di cobra consumidornan.
