Den ultimo dianan, diferente lector a acerca Redaccion di Bon Dia Aruba pa expresa preocupacion pa atraso den servicionan na Censo. Segun e lectornan, e atraso ta causando inconveniencia y tin impacto negativo den diferente manera.

E problema principal ta parce di ta e parti di registro.

Un lector a conta Bon Dia Aruba cu recientemente el a muda back na Aruba despues di a biba algun aña den exterior. El a schrijf uit den exterior, y riba e mesun dia cu a yega Aruba, a haci e registro online na Censo pa schrijf in akinan. Sinembargo, mas cu un siman a pasa y su aplicacion pa registro na Censo no a keda completa. Dus e persona a keda sin ta registra na Aruba ni den exterior, kiermen, e no tin un adres legal.

Esaki a trece consecuencia desagradable pa e persona aki, ya cu e no por haci ningun di e tramitenan legal cu ta rekeri, por ehemplo, prueba di residencia y adres, manera e papel di Afl. 5. Cosnan manera habri un cuenta di banco of hasta registra su yiunan pa atende scol, ta keda para mientras cu Censo ta tarda pa aproba e registracion. Y entre tanto, no tin otro solucion, y e famia ta keda afecta. Teniendo cuenta cu e servicio ta asina esencial cu por stroba bida di un hende di un manera asina drastico, e atraso aki ta inaceptable.

Otro ciudadano a conta cu esaki tambe ta un problema pa stranheronan cu recientemente a ricibi nan permiso. Nan mester di registra na Censo y tin prueba di adres pa, entre otro, DIMP. E problema cu nan ta hayando ta cu nan no por bay haci nan registro, pasobra mester traha un cita online, y tur slot di cita ta tuma caba, y no tin cita disponible pa lunas.

Luna pasa, Censo a splica medionan local cu Censo a nota un aumento den cantidad di permiso, loke a causa cu tin un periodo di espera mas largo. Ademas, ta eherciendo mas cautela den e proceso di inscripcion ta complica y mester sigura e legalidad di tur documento; particularmente despues cu tabatin casonan di falsificacion. E control riba e validez y legalidad di e documentonan ta keda den man di Censo, y pues e trahadornan tin nan man yen. E tempo aya, director di Censo a bisa cu ta cuatro empleado plus un hefe tin den e departamento cu ta maneha inscripcion, y esaki ta haci cu e cantidad di inscripcion cu nan por procesa y verifica cada dia ta limita.

Tambe a menciona e problema cu tramitador, cu segun director di Censo, ta reserva tur cita y ta haci cu no ta resta cita disponible pa otro persona cu mester haci uso di e servicio. Pero banda di conseha hende pa no haci uso di tramitador, no a menciona un otro solucion pa resolve e problema aki.

E situacion di atraso na Censo no ta algo cu ta afecta un of dos persona so. Bon Dia Aruba a compronde cu tin cantidad di hende cu ta den e mesun situacion, unda di cierto manera, atraso den Censo tin nan tramitenan pega, sin cu tin un solucion otro cu keda warda.

Informacion no confirma cu a yega mesa di Redaccion ta indica cu tin problema di organisacion y di personal. Tin trahador cu ta cu vakantie, y ta parce cu no a organisa bon pa otro colega cubri e tareanan mientras tanto, sino cu ta bisa e clientenan cu mester warda te ora e persona bolbe di su vakantie.

Bon Dia Aruba a tuma contacto cu director di Censo, Sharin Luydens, y a puntra si por confirma e informacion. Tambe a pidi si por duna conseho y tips pa e personanan cu por ta wardando pa e tardansa di Censo, si tin algo nan por haci mientras tanto. Sinembargo, no a haya ningun contesta.

Entre tanto, e ciudadanonan ta keda disgusta, preocupa y sin solucion.