Desde maart cu gobierno nobo a keda huramenta como Gabinete AVP-Futuro, e lidernan politico ta dunando forma na e aparato gubernamental door di nombra diferente persona pa posicionnan clave. Sinembargo, algun nombramento a haya critica di pueblo, cu a cuestiona e proceso di nombramento pa diferente motibo, entre nan, cu a nombra hende pa “posicionnan inventa.”

Den weekend, e nombramento di Rondel Heyliger – kende tabata candidato riba lista di partido Futuro – como “District Advisor” den ministerio di Finanzas, Economia y Sector Primario, a ricibi hopi atencion – y hopi critica.

Riba rednan social, diferente usuario a cuestiona e nombramento. Entre otro, A.S. a comenta: “Ta pakico a ‘baha’ e cantidad di minister anto. Esaki ta pio ainda. Yen nombracion raro.”
Di su banda, J.C. a puntra “con ta cu e ‘open sollicitatie’ anto pa funcionnan nobo y inventa? (…) AVP a inventa un diplomatico y FUTURO ta su turno awo pa igual’e.”
Q.B. a bisa: “Yen di nombramentonan straño cu nunca tabata existi, awo tur ta haya cualkier puesto inventa.”

Pero esaki no tabata e unico ni e prome nombramento cu a ricibi critica. Anteriormente caba, e nombramento di Michael Lampe como “Diplomatico Cultural” di Aruba na Hulanda tambe a ricibi critica.
Usuarionan M.N. y M.G.R. a yam’e un “nombracion politico,” mientras M.S. a comenta: “Mi a kere ta un joke nan a conta mi, awo ta bon, placa tin pa friends and family.” T.T.T. a agrega cu “nan no sa mas ki funcion mas pa inventa pa hinca nan payasonan anto no cu salario di circo sino cu salario astronomico y si sigui asina un djis pueblo tin biyones di debe pa bay paga atrobe cu hopi orguyo.”

Otro usuarionan a recorda e comentarionan di prome minister Mike Eman (AVP) tocante e idea pa introduci “Secretario di Estado” den gobierno di Aruba. E tempo aya, e idea a ricibi hopi critica pa motibo cu e no ta algo cu Aruba conoce, y ademas, e lo aumenta mas ainda e costo di personal den un aparato publico cu ya ta hopi grandi pa un pais chikito manera Aruba.

Otro nombramento a haya critica pa e caracter di e persona nombra. Lider di Fraccion MEP a critica e nombramento di Gerald Rasmijn den un posicion di confiansa den gobierno di AVP-Futuro. “E nombramento aki ta mas cu un nombracion politico. E ta un mensahe pa nos sociedad cu sexismo y humiliacion publico di hende muher no solamente ta wordo tolera, sino ta wordo recompensa pa e gobierno di Mike Eman y Gerlien Croes. Gerald Rasmijn a usa su pagina di Facebook “Pa Tin Pret” pa burla na forma hopi mahos di e ministernan femenino di mi gabinete, incluso trahando y repartiendo videonan pornografico falsifica, pa ridiculisa nos como hende muher,” parlamentario Evelyn Wever-Croes a expresa riba su rednan social. Tambe a critica e nombramento di Marko Espinoza como perschef, pa motibo cu e tin un condena relaciona cu e caso di portofon di polis, caso Kini Kini.

Tambe tabatin critica riba nombramento di Frank Hoevertsz como director interino di Utilites.
Parlamentario Wever-Croes a splica cu Hoevertsz tin un historia den mal maneho na FCCA y na Utilities Aruba NV. Ademas, el a agrega, recientemente a bin acusacionnan grave di abuso sexual di menor pa e persona aki cu, segun e parlamentario a indica, ainda no a defende su mes di dje. “Esaki ta atacha e imagen di henter e compania, y di minister Dowers tambe cu ta yuda tapa un delito sexual asina serio,” el a subraya.

Esaki ta algun ehempel, maske otro nombramentonan tambe a ricibi critica di pueblo.

Tambe a bin critica pa e falta di transparencia den e proceso di nombramento y contratacion di e personanan aki, y otronan. Comentarionan riba rednan social hopi biaha ta puntra si a duna oportunidad pa solicita den un vacatura abierto. Hopi biaha gobierno, di cualkier signatura, obviamente lo busca pa posiciona hende di confiansa den posicionnan clave. Sinembargo, e biaha aki e falta di transparencia a duna espacio pa hopi cuestionamento y critica.