Recientemente Departamento di Obra Publico di Aruba (DOW) a anuncia cu nan lo ta introduciendo un metodo di mantencion nobo pa caretera y lo cuminsa realisa esaki riba caretera di Green Corridor. Lectornan di Bon Dia Aruba a tuma contacto cu nos mesa di redaccion y a cuestiona pakico ta scoge pa haci mantencion riba Green Corridor, cu ta den relativamente bon estado, y no ta haci mantencion riba caretera na otro partinan cu ta den pio estado.

No ta un secreto cu na Aruba tin un problema cu careteranan cu ta den mal estado. Pa hopi aña e problema aki ta persisti, y a pesar cu continuamente DOW ta realisa trabaonan di mantencion y ta drecha caretera, tin careteranan cu ta den asina mal estado cu auto no por ni pasa, cu no ta haya e atencion debido di DOW.

Manera ya caba indica, recientemente DOW a anuncia cu nan lo ta realisando trabou di mantencion riba Green Corridor. Pa motibo di esaki algun lector di nos corant a tuma contacto cu nos mesa di redaccion pa expresa nan frustracion, ya cu tin caretera cu, den nan opinion, mester tin prioridad pa ser drecha, mas ainda mirando cu e caretera di Green Corridor ta relativamente den bon estado.

E lectornan ta cuestiona kico ta e metodo of criteria cu DOW ta usa pa scoge cual caretera ta na beurt pa ser drecha y pakico no ta duna e careteranan aki prioridad. Algun dia atras, reportero di Bon Dia Aruba a tuma contacto cu un representante di DOW pa haci e mesun preguntanan aki cu lectornan ta pidi contesta riba dje, pero no a logra haya contesta.

Durante e conferencia di prensa anunciando e implementacion di micro paving pa mantencion di caretera, DOW a splica cu fondo pa mantencion di caretera ta limita, unda antes e instancia tabata 2,5 miyon florin tur aña pa trabou di mantencion. Sinembargo, a splica cu pa “haal in” e deterioro riba caretera lo rekeri un presupuesto di 18 miyon florin anualmente pa e proximo 25 aña. Sr. Daryl Lue, hoofdbeheer di infrastructura na DOW, a splica cu aña pasa e instancia a haya un presupuesto di 18 miyon florin unda a nota caba cu esaki a mehora operacion di DOW pa mantencion di caretera. El a indica cu e aumento di presupuesto pa e suma aki lo crea mas espacio pa DOW aborda partinan mas deteriora.

Tabata den luna di februari cu DOW a publica un comunidad di prensa pa informa comunidad tocante e metodo di mirvo paving despues cu nan a ricibi un cantidad di pregunta tocante bultonan (saco blanco) cerca di e brug di Green Corridor, cu a resulta di ta materialnan pa micro paving.

Micro paving ta un mescla di polymer modifica, cual al contrario cu e metodo tradicional di basha asfalt cayente, ta ser aplica friu riba e capa di asfalt existente pa asina alarga e bida di e caretera. DOW a splica, e asfalt friu aki tin hopi awa y ora esaki evapora, e asfalt restante lo crea un capa cu ta fortalece e asfalt existente. A enfatisa cu esaki ta un sistema conoci mundialmente caba pero te awor a ser introduci pa Aruba. A splica cu a mira e beneficio di e metodo aki pa mantencion di caretera riba nos isla, specialmente despues cu e instancianan a observa e funcionalidad di micro paving na Colombia, unda trafico ta hopi mas druk. Tambe a bisa cu e metodo aki lo yuda preveni dañonan causa pa yobida, sigurando cu e capa lo keda bon cubri.

Ademas DOW a remarca cu e implementacion di micro paving ta forma parti di un metodo preventivo, unda na momento apropia lo introduci e metodo pa mehora funcionalidad di e caretera ora esaki mustra señal di deterioro. A subraya cu e metodo aki no ta atende e restructuracion di caretera, pues no ta apto den casonan di careteranan completamente deteriora manera riba caretera di WEB bay Barcadera of Franse Pas.

Den luna di mei Parlamento di Aruba a aproba e presupuesto di DOW pa aña 2025. Durante e tratamento aki tambe e minister encarga e tempo ey cu infrastructura, minister Arthur Dowers a contesta algun pregunta pa loke ta maneho y planificacion di asfaltamento di careteranan. El a indica cu tin cierto listanan traha, tin un programa, un periodo stipula pa cierto trabou y cu lo mester reevalua cierto di e aspectonan aki pasobra talbes tin situacionnan cu ciudadanonan ta trece dilanti cu talbes no ta riba e listanan actual.

Ademas el a indica cu pa loke ta trata planificacion di asfaltamento den bario hopi biaha e peticionnan cu ta ser haci, ta ser realisa door di ciudadano y tin un planificacion pa mas cu un aña y esey DOW ta tene cuenta cune, pero gobierno lo bay reevalua esaki den e periodo dilanti.

Mientras tanto DOW ta continua cu trabounan di micro paving manera planifica. E trabounan aki a inicia den luna di maart y segun calculacion di DOW e trabounan aki lo finalisa pa luna di october.