Ciudadanonan ta opina si mester reenforsa of elimina Aruparking

Riba rednan social tin un encuesta cu a bin hayando diferente reaccion di comunidad tocante e topico di Aruparking. Pa algun ciudadano segun nan a indica, e sistema aki mester wordo reenforsa y otronan ta pensa cu ta miho pa elimin’e.

Aruparking ta existi desde November 2014 y ta un compania perteneciendo na Arubus. Nan tin 25 empleado den servicio, parti entre parkeerwachters y personal administrativo. Aruparking ta maneha riba 1300 parkeerplaats den henter e area di Oranjestad, di cual mas o menos 800 ta pa clientenan cu ta bishita e area pa haci compras of haci respondi. E resto di espacio ta reserva pa empleadonan den e area, cu no necesariamente mester staciona nan auto mucho cerca debi cu nan auto tabata keda eynan pa mas di 8 ora largo.

Na luna di september di aña di 2015 na momento cu e implementacion di Landsverordering Parkeermeters a drenta na vigor, a otorga autoridad special di supervision na e grupo di casi 25 empleado di Aruparking. Nan trabao tabata varia for di controla cumplimento di e tarifanan pa parkeer, pa autonan mal staciona riba acera of na luganan prohibi pa borchi.

E sistema aki a trece malcontento den cierto sector di comunidad for di e momento di su implementacion, pa motibo cu hende tabata indica cu esaki tabata afecta e economia di Playa, mirando cu no tabatin mucho luga pa parkeer auto. Tempo despues e sistema aki a stop di funciona.

Den ultimo dianan a bin dilanti diferente discusion tocante e reintroduccion di Aruparking. Di esaki, minister di Transporte, Ursell Arends den un comunicado di prensa a señala cu su intencion ta pa “trece orden y accesibilidad den centro di ciudad cu Aruparking, di un sistema caotico pa un sistema regula.”

Na Aruba tin alrededor di 80.000 number di auto, di cual un cantidad grandi ta ocupando nos careteranan. Segun informacion di Aruparking, tin alrededor di 960 parkeervak blanco, un otro 679 parkeervak geel y 12 parkeo pa esnan cu discapacidad. E 1651 espacio di parkeer aki den centro di ciudad por acomoda apenas alrededor di 2% di e autonan na Aruba.

“E realidad aki ta haci cu parkeo den centro di Oranjestad no por sigui den forma di Wild West. Pa medio di regla y ordo por garantisa mas y miho mobilidad den centro di ciudad y otro partinan caminda tin comercio. Den comercio tambe tin conviccion cu un sistema bon organisa ta trece beneficio pa tur. Ta imposibel pa culpa Aruparking pa e situacion cu Oranjestad ta aden awe pasobra pa e ultimo 5 aña cu Aruparking no tabata activo no por bisa cu tabata tin desaroyo den centro di ciudad,” Arends a bisa den e comunicado.

“Ta importante pa menciona cu na momento cu a apunta miembronan di Raad van Commissarissen di Arubus a percura cu tin un representante di sector comercial di Oranjestad, pa asina por vocifera e deseo di comerciantenan di centro di ciudad. Palabracionnan actual ta cu lo trece Raad van Commissarissen nan conseho cerca conseho di minister y lo delibera e manera pa reactiva Aruparking den su totalidad” e comunicado a señala.

Minister Arends ta spera cu e reintroduccion di Aruparking por trece orden den e situacion caotico di parkeo den centro di ciudad y contribui na e desaroyo di Oranjestad completo. Den e manera aki ta stimula nos economia y tambe hasi e area aki mas accesibel pa tur den nos comunidad.

Encuesta: Aruparking elimina of reenforsa?

For di dia 11 di november e pagina di Facebook Survey Aruba a publica un encuesta pa comunidad di Aruba por duna su opinion riba si e sistema aki ta continua di un manera ‘mas efectivo’ of si kier pa elimin’e di manera definitivo.

Den esaki ya caba tin centenares di comentario di usuarionan di Facebook unda algun di nan a duna diferente ideanan como por ehemplo:

“E autonan di trahadonan den Caya mester ta na un parkinglot pa nan so. Pasobra awo cu bo bay no tin caminda di para entre 9am pa 6pm. Dus abo como cumprado tin pa para leu di caya pa cana bay den caya. Elimin’e pero ta busca solucion? Arutram supposed di tin mantencion di turistanan di barco, cu cada un ta paga prome cu subi barco, esey ta mantene Tram limpi y pa paga chauffeurnan, mester check cu Gobierno di e placa ey, y e florin pa parkeer ta yuda esnan cu ta traha Aruparking y mantencion di luga di parkeer parkinglot, pasobra trahadonan di Aruparking tambe tin famia. E daño grandi a wordo haci caba, hopi negoshi a cera pa e motibo di a destrui Caya pa un tempo demasiado largo, y no pa motibo di pandemia. Nos ta bibando na Aruba awo, nu, now.”

“Lag’e e ta masha bon asina bo no ta haya auto para casi meymey di caminda y tur mal para. E hendenan no ta respeta e invalide vak. Pakico ora bo bay afo si bo ta respeta? Ata Curaçao tin di dje y tur ta respeta. NO ta Aruparking a caba cu caya grandi ta e mallnan cu a habri rond Aruba esey a caba cune; y ademas den caya tur paña ta mescos, liber di Mango y la Moderna. Otro cos e edificionan ta mucho caro pa huur so ta esey a caba cu caya grandi NO ARUPARKING.”

“Elimin’e, pero e mesun momento busca 3 luga strategico cu por traha edificio di multiple piso (parking garage) cu por cobra algo.”

“Elimin’e of cambia su meta (regula parkeo ordena) sin molestia hende cu e stickernan. Esnan mal para laga touw nan.”

“Habri caya back pa trafico (no pisa) pero den e concepto actual nunca Aruparking a funciona y cu tempo a bira hasta un molester y tin un imagen negativo den pueblo.”

“E parkeer plaats banda di ex-Hotel Central e lugar ideal pa traha multiple piso pa un parkeergarage”.

“Ami si ta kere pa reenforsa asina por sikiera trece ordo y disciplina den chauffeurnan . Financieramente ta un parti di solucion pa Arubus cu tambe ta bou di e loop di guillotina Hulandes yama Landenpakket. Tram por sigui existi. Caya Betico Croes/Nassaustraat mester keda cera pa tur trafico di motor sea ariba 2, 3 of 4 wheel durante oranan di oficina. Por habri caya despues di 7or anochi.”

“Mester elimin’e. Como trahado atrobe ata nos tin cu saca pa luna atrobe mas gasto, como si fuera awa y coriente caro no tabata suficiente pa bay cu tur nos salario. Awo algo mas acerca pa luna!”

Igualmente e topico ta sigui den proximo dianan unda lo dicidi si e sistema aki ta bay keda of lo wordo reenforsa den diferente arenanan di Oranjestad.