Den ultimo dianan, Stichting Maneho di Aruba su Carnaval (SMAC) a publica riba su rednan social un invitacion pa bandanan musical confirma nan presencia diasabra 7 di februari pa 3or di marduga na San Nicolas, pa e Jouvert Morning di Carnaval 72.

Te awo, SMAC a confirma presencia di Groove Masters na un di e eventonan mas popular di Aruba su Carnaval. Tur aña, carnavalistanan ta disfruta di e energia unico di pariba pa Jouvert Morning, luciendo nan creatividad y sentido di humor cu pañanan dibertido y bon ambiente. Jouvert ta un evento particularmente stima entre comunidad local, specialmente esnan bibando na San Nicolas.

Na caminda pa diasabra, aki un tiki historia di Jouvert Morning.

Den Creole Antiano Frances, Jouvert kiermen “salida di solo”, deriva di e Frances “Jour Ouvert.”

Jouvert Morning, of simplemente ‘Jouve’, ta cuminsa den mita di anochi, usualmente pa 3or di mainta, y ta continua te salida di solo. Durante añas, Jouvert no solo a bira un clasico di temporada di carnaval, sino tambe a bira un di e tiki parada cu tin un significado cultural pa Arubianonan.

E tradicion di Jouvert, hopi similar cu e tradicion di carnaval en general, tin su raiz den inmigracion. Inmigrantenan di otro islanan di Caribe manera Trinidad y Tobago a trece e tradicion aki riba cayanan di San Nicolas, unda e comunidad bibando eynan – consistiendo mayoria di inmigrante Afro-Caribense pa motibo di e boom industrial den e distrito durante inico di siglo 20 – tabatin e fiestanan di “jump up” aki, completo cu musica di steel pan y calypso.

Segun storia ta conta, Jouvert a cuminsa na Sint Maartenstraat na San Nicolas, cu hende treciendo instrumento traha na cas manera panchi, hemchi, blek’i lechi, y otronan pa toca y baila riba caya. Awendia hende tambe ta referi na Jouvert como un parada di fiesta di pajama, ya cu hende por bin join bistiendo paña comodo y regular.

Jouvert ta e unico parada den temporada di carnaval unda tur hende ta bon bini pa uni e parada y baila, compaña pa un of dos banda tocando musica Soca.

Den un entrevista cu Bito Wilson den e buki “Liber Amicis Bacchanalibus” di Friedrich van der Hans, e ta conta con na 1979 diabierna prome cu e parada na San Nicolas nan a tene un BBQ, unda nan tabata come y bebe y toca musica improvisa. Nan a bay asina den e musica cu nan a djis subi caya ta baila, canta y toca te cu polis a core cu nan. Nan a bay back The Village y a sinta pensa kico pa haci. Nan a dicidi pa tene e tradicion mescos cu tabata haci pa Bispo di Pasco, y pa 12or di anochi a bolbe subi caya cu nan instrumento pa toca, baila y canta. “Hende a join nos door di sali di nan cas ainda den nan pajama y a yega e cayanan te cu polis a bolbe pa stop nos pasobra nos no tabatin permiso,” Wilson a conta. “E biaha aki a aresta nos y hiba nos warda cera.”