Despues cu tabatin varios comentario den prensa Hulandes cu, segun nan, gobierno di Aruba no tabatin ningun intencion di presenta e cambio di ley na parlamento, pa crea e cuadro legal necesario pa CAft sigui haci nan trabao di supervision, nos por a tuma nota cu e proyecto di ley en berdad a yega parlamento. Lo nan bisa awor cu ta nan accion a percura pa e repentino diligencia pa e documento yega unda e mester a yega, pero enfin, esey no ta gran tema di debate.

Mester bisa si cu e supuesto intencion di gobierno di no haci nada ta mustra un poco straño pa esnan cu conocimento di e materia aki. Hecho ta keda semper, si nos contempla origen di e ley aki, cu el a nace di e resistencia di gobierno di Aruba di e tempo ey contra un medida di Reino (Algemene Maatregel van Rijksbestuur) cu lo a tuma control di finanzas di Aruba. E modelo di con lo a haci esaki nos por a mira un aña prome, tempo cu gobierno di Aruba a haya un medida asina. E documento ey ta conta den detaye con leu e asunto ta bay, unda tur funcionario publico y tur entidad estatal ta na disposicion di Gobernador y den e asuntonan concerni e gobierno di e momento ey no tin nada di bisa. Un aña despues, na 2015, esey tabata na punto di sucede atrobe, pero na ultimo ora a bin cu e forma actual, di un ley di Aruba, unda gobierno di e tempo ey por a gaba cu nan no a haya un Maatregel van Rijksbestuur, pero cu “ta nos mes a regla e asunto.” Bon bisa, a haya e oportunidad pa pone e soga rond di e propio nek, djis pa por bisa despues cu bo tabata e actor, y no e victima den e asunto.

Pa bolbe na actualidad, ta con e reporteronan Hulandes aki, cu aparentemente tin hopi bon contacto na Aruba den cierto circulo politico, ta kere cu e asunto aki lo a sigui, si berdaderamente gobierno actual tabatin e intencion di no pasa e cambionan aki. Lo Hulanda a keda sin actua, y djis laga tur cos asina? Ni den bo soñonan mas color di rosa bo por kere esaki. Simplemente no tin motibo pa bay busca e tipo di pleito aki, cu bo no lo por gana nunca, di ningun manera.

Cu esey for di caminda, dentro di poco nos lo tin e cuadro legal vigente pa CAft haci su trabao. Sin embargo, e aspectonan menos bunita cu Conseho Consultivo (Raad van Advies) ta señala. E ley ta keda un monster crea cu e solo meta pa evita algo na nivel di Reino, mientras cu realmente esey lo tabata e unico manera pa regla esaki bon, ya cu ta trata di duna facultad y crea obligacion pa organonan Hulandes y di Reino, loke no por regla den un ley local. Aunke e Conseho a sugeri pa haci e cambionan den e proyecto aki, esey no lo sucede, tambe pasobra e protocol di november 2018 ta limita e acuerdo na e cambionan pa loke ta e criterionan pa presupuesto. Di otro banda, loke si a regla den e cambio di ley aki ta e asunto di e ex-mandatarionan Hulandes, cu segun e normanan estricto di e ley lo no por ta miembro di CAft, loke si a sucede. Di igual lo por a regla e sugerencia di RvA pa laga Gobernador no firma e ley di presupuesto mesora, pero despues cu a pasa den e tramite di e conseho di CAft na gobierno di Reino. Si no, nos ta haya e problema cu e representante di Rey ta firma un ley, pa despues haya instruccion di e mesun Rey pa cambia e ley segun e instruccion (aanwijzing) cu gobierno di Reino ta duna. Tur cos hunto, e conclusion mester ta cu e ley aki nunca lo gana premio di beyesa, pero ta keda un producto mediocre pa purba core pa un medida di Reino.

Di otro banda, no tin pakico di tin tanto discusion mas tocante e ley aki. Di banda di e fraccionnan di coalicion nan sa cu ta indispensable regla e asunto aki, pa por move riba otro asunto urgente cu tin. Di banda di oposicion no ta facil pa duna comentario tampoco, pasobra ta nan tabata para na cuna di e monster aki, y ademas a aproba e desaster financiero causa pa nan gobernantenan.

Loke tin prioridad na e momento aki, ta con ta mantene gasto publico bao control y con ta percura pa nos economia cuminsa crece mas fuerte. Ningun di e dos tareanan aki lo ta facil, pero loke ta importante ta cu ta actua cu firmesa. Concentra riba desaroyo na San Nicolas ta parce nos un prioridad grandi, tambe y sigur si no lo tin ni hotel grandi, ni refineria. Nos mester por logra sin ningun di e dosnan aki, pasobra e facilidadnan portuario, plus e uso sensato di e tereno di e refineria pa diferente actividad economico ta duna multiple oportunidad. Si djis nos por a conta, maske pa un biaha so, pone ego y interes personal un banda y pone Aruba na prome lugar.