Durante un evento pa introduci e CEO nobo di MCB Group di cual Caribbean Mercantile Bank ta forma parti, e banco haci entrega di un donacion di 120,000.00 florin na e departamento di mucha di Horacio Oduber Hospital (HOH).
Gerencia di HOH tabata presenta pa ricibi e suma aki cu lo wordo destina exclusivamente na mehora condicionnan di e facilidadnan unda nos muchanan ta wordo atendi.
Director General di CMB ta expresa cu parti esencial di e banco su obhetivonan ta di por comparti cu comunidad, anto ki miho forma cu haci esaki yudando muchanan di Aruba, specialmente esnan cu pa un of otro motibo mester pasa un tempo den hospital. “E no ta placentero pa mester keda hospitalisa y pasa tempo leu di bo famia. Mas ainda si bo ta un mucha. Dus si nos por contribui pa alivia esaki, nos lo haci esey.
Jacco Vroegop y Gregory Croeze, di Hunta di Directiva di HOH tabata presente y a acepta e donacion aki. Croeze ta añadi: “Den salubridad cada florin ta rende y tin efecto riba no solamente e pashent y su famia pero tambe e personal cu awor por ta mihor ekipa pa duna un miho servicio. Segun Croeze e donacion aki ta mas cu solamente placa, e ta un muestra di confianza y solidaridad entre e dos organisacionnan. Nos ta kere den un futuro unda cuido ta accesibel, mas personal y mas innovativo. Gesto of donacionnan asina aki ta haci nos yega mas cerca di nos vision y p’esey nos ta hopi agradecido na CMB y tambe MCB Group.”
Cu’n sonrisa grandi Jacco Vroegop ta conta cu: “Mi ta hopi agradecido y ta gradici banco CMB pa nan generosidad di nan donacion na departamento di mucha di Hospital di Aruba. Nan sosten ta haci un diferencia real den e bida di nos pashentnan di mas jong y nan famia. E ta refleha un compromiso mutuo y cu ta hopi importante pa e bienestar di nos comunidad.
Mester remarca cu e donacion aki ta wordo haci den nomber di e CEO saliente, Chicu Capriles, cu ta un persona bon conoci y aprecia den nos comunidad local. Chicu lo wordo reemplasa pa Quinten Fraai, manera ya anuncia algun luna pasa.
Riba e foto adhunto por mira Gregory Croeze, Armin Solognier, Quinten Fraai, Albert di Mauro y Jacco Vroegop.
