Coach Sandra Croes: 57 aña dedica cu amor y pasion na e deporte di baskteball

Coach Sandra Croes tin 57 aña trahando aportando na e deporte di basketball na Aruba. Den un entrevista cu Bon Dia Aruba e ta conta di su trayectoria, e diferencia entre antes y awor den basketball y tambe di dos hoben atleta cu recientemente a participa den un camp di basket na Orlando.

Actualmente Sandra ta traha como manager na FA Croes, un negoshi di famia cu su tata a lanta 75 aña pasa. Ademas di esey keto bay e ta activo den e deporte di basketball, ya pa 57 aña.

El a conta cu el a cuminsa hunga y train basketball tempo e tabatin 17 aña, ora cu el a bin back for di Hulanda. E tabata hungador su mes y ora e tabata train tabatin yen mucha rond ta wak. Un dia el a puntra e muchanan si nan ta gusta basketball, nan a bisa si. Asina el a cuminsa traha team di e muchanan cu tabat’ey y su trayecto como coach tambe a cuminsa.

El a sigui conta cu e ta coach team di mucha homber, team di mucha muhe fuerte y tambe team mixto, mucha muher y mucha homber. Pa varios aña Sandra su teamnan ta gana campeon y sub-campeon den campeonatonan pareu ya cu e tabata coach teamnan di dos division pareu.

Sandra a remarca cu su meta semper tabata pa yuda e muchanan haci algo positivo pa nan no cay den mal caminda. “Semper mi a pensa pa yuda kita e muchanan for di riba caya, yuda y mi a haci’e boluntariamente full 57 aña,” el a menciona.

Aworaki e tin dos team, un team di mucha muhe y un team di U14 mixto, mucha muhe y mucha homber, Hunto den total e ta coach alrededor di 20 mucha.

El a splica cu aworaki tin algun aña caba cu casi e muchanan no ta bay afo mas y ta participa den campeonatonan nacional so, pero esaki ta un meta cu lo desea di logra den futuro. El a sigui splica cu di Aruba Juniors mes nan kier traha un comision di mayor pa traha y asina cuminsa purba organisa pa e muchanan biaha pa hunga afo. Esaki, el a remarca ta bira un motivacion grandi pa e muchanan keda practica basket.

“Mester motiva e muchanan cu algo pasobra si no bo ta perde nan. Hopi mucha a bay laga nos caba y a bay otro deporte. Basketball lamentablemente a cay hopi ultimo añanan y mi ta hay’e hopi jammer. E team di mucha muhe mes tabatin añas cu no tabatin campeonato di mucha muhe. Aworaki tin dos aña cu e muchanan muhe ta back, pero ta dos team so tin. A cuminsa cu tres, pero mientras tanto den campeonato un a cay afo y a keda cu dos. Awor tin dos aña cu nos a bin back, pero e ta hopi zwak. Mi no sa kico ta falta,” el a expresa.

A pesar cu ainda falta hopi mehoracion pa yuda e deporte di basket crece atrobe, tin algun hoben cu t’ey fuerte ainda y ta keda practica e deporte. Recientemente dos hoben, Ruby Pearce y Girienny Thiel, a participa den un camp na Orlando Florida.

Sandra a splica cu Ruby ta un hungado Aruba Juniors mes. El a cuminsa train cune tempo e tabatin 10 aña y te ainda e ta hunga. Girienny ta un hungado di e team di Estrella, pero den team di damas e ta hunga cu e team di Sandra di Aruba Juniors como un ayudo. Y e otro, Girienny ta eigenlijk di tema di Estrella, pero den team di damas e ta hunga pa Aruba Juniors, pa asina reforsa e team di damas door cu no tin suficiente mucha.

Ruby y Girienny a caba di bin for di e Magic Camp na Orlando caminda nan a participa un par di dia, un experiencia diferente pa e muchanan.

“Nan a hay’e hopi interesante y a bisa cu nan a hay’e un bon training y a yuda nan hopi. Te ainda mi no a train cu nan despues cu nan a bin back door cu ta vakantie, pero ora cuminsa back mi lo wak e diferencia despues di nan participacion,” Sandra a indica.

Sandra a splica cu esaki tabata un oportunidad cu nan a ricibi danki na otro coach di Aruba Juniors, coach Richard, ken tin e contacto pa participa na e camp aki. El a ofrece e oportunidad na e tur e muchanan, sobre todo na e damanan. El a sigui splica cu na comienso un grupo basta grandi tabata interesa, pero poco poco hopi a cay afo pa motibo di gasto, aunke nan a purba fundraising pero no a logra.

“E dos hoben aki a logra bay riba nan mes y ami ta hopi contento cu nan a logra participa den e campamento aki. Mi ta spera cu por haci e camp tur aña caminda cu di manera adelanta por haci fundraising adelanta y asina motiva mas mucha pa algo asina,” el a enfatisa.

Pa loke ta diferencia entre antes y awor, Sandra ta splica cu tin un diferencia hopi grandi, cual ta e actitud di e hobennan. El a indica cu no ta a den mucha muhe so, pero en general, e diferencia mas grandi ta e actitud y e interes cu no ta manera antes mas.

“Nan no ta hunga cu curason mas, nan ta hunga pasobra nan mester hunga of pasobra nan mama a manda nan. Pero echt hunga cu curason no mas. Mi ta kere cu e cos cu ta stroba ta e weganan electronico. Esey mi ta kere ta e cos cu ta stroba e mucha. Nan ta prefera keda cas riba e weganan ey. E actitud y disciplina ta hopi diferente awor compara cu antes,” el a enfatisa.

Por ultimo Sandra su mensahe pa mayor y hobennan deportista: “Mi mensahe na e sobre todo e mayornan ta pa coopera pasobra awendia e no ta manera antes. Antes e mayornan ta bin y ta hasta keda training, nan ta bin tur wega. Aworaki bo no ta wak e mayornan. Nan ta baha e muchanan y bay. Y pa e hobennan, ban drenta deporte, ban haci deporte e ta bon pa bo. Mañan porta bo tin un chance pa hunga afo un caminda. Wak den baseball nos tin hendenan ta hunga afo. Mi ta spera nos por logra esey tambe den basketball.”