E reduccion di gasto publico ta un di e metanan specifico di e Organo di Reforma y Desaroyo, COHO y e landspakket pa Aruba. Y e reduccion aki lo no sosode sin cu e ta bay haci dolor. Pasobra e ta bay trece un cambio den e forma con aparato publico a opera pa decadanan y hasta tin como obhetivo pa saca politica for di e proceso di nombramento di personal. Pero, kizas mas yamativo ta cu ta bay haci un evaluacion completo di cada trahado, nan funcionamento y si nan merece e posicion cu nan ta den y ta ricibi e salario cu berdad nan merece.

Den e landspakket, COHO ta bisa cu meta ta controla y pone na ordo e maneho y supervision financiero pa asina percura cu Gobierno ta keda den control. Lo bay busca forma pa determina con pa fortifica e columna financiero basa riba investigacion existente of complementario. Aki lo mira en todo caso na e control financiero y di maneho, tanto central como na e diferente servicionan, e funcion di auditoria, y e posicion di Conseho Consultativo (Raad van Advies) y Controleria General (Algemene Rekenkamer).

E landspakket ademas lo determina con lo fortifica desaroyo di maneho di decisionnan, basa riba uso di informacion estadistico y data confiabel.

Lo tuma mesun pasonan pa midi si e maneho di subsidio, relacionnan di subsidio existente ta cumpli cu e exigencianan di legalidad, legitimidad, efectividad y eficiencia. Lo determina a base di investigacion si lo tin adaptacion di maneho y ehecucion, di forma cu esnan cu a ricibi subsidio y no a cumpli cu e rekisitonan, lo mester paga esakinan bek cu tempo, den cuadro legal y di principionan di derecho.

Tambe lo determina con pa fortifica y e funcion di compra di servicio y producto, pa asina e por ta efectivo y mara na obhetivonan (red. na e momentonan aki, cada Minister ta haya un suma pa nan haci nan compra di servicio y producto, y no tin claridad con cada uno ta usa e fondonan). COHO ta propone un compra centralisa.

Costo y efectividad di sector publico

E costo di salario di sector publico mester baha na e promedio Caribense di 10 porciento di e Producto Bruto Nacional ademas cu mester gastonan di sector publico en general, y mehora su calidad y efectividad. Segun calculacionnan pre-Covid, e gasto publico total riba e Producto Bruto Nacional di Aruba, ta 12 porciento. A baha 12.5 porciento di e salario y beneficio di trahadonan publico caba, pero e Producto Bruto Nacional tambe a cay drasticamente, te na 3992 miyon post Covid.

Los di tur locual ta den e pakete, Aruba mes lo keda encarga pa continuidad di e procesonan vital, manera coriente, provision di gasolin, internet, awa, aviacion, etc., HOH y IMSAN

COHO lo desaroya y implementa proposicionnan basa riba un revision integral riba legitimidad di accionnan di Gobierno den companianan di Gobierno y tambe sui generis, ademas di entidadnan publico (nan ta sirbi interes publico?), nan efectividad y eficiencia. E meta ta pa fortifica bon maneho pa limita futuro perdida y evita risico pa presupuesto di Aruba. E no ta un obhetivo riba su mes pa bende entidadnan publico of companianan di Gobierno si ta keda determina cu nan ta sirbi interes publico

Calidad, efectividad y implementacion di organisacionnan publico lo mester keda mehora, incluso e capacidad di e ministerionan. Tambe ta bay tin reduccion di gastonan di overtime, areglo di vakantie of dianan liber, recompensacion special, biahe y compensacion di biaha pa asina logra mas reduccion di gasto publico.

COHO ta bay analisa e formacion, e ocupacion y e presencia real ademas di e funccionamento di empleadonan publico y di organisacionnan publico. Si trahadonan ta ricibi un salario cu no ta cuadra cu locual nan merece, dependiendo di e situacion, lo tuma medida, pues sea ta para e salario of hasta ta cuminsa e procedura di retiro. Tambe lo desaroya un maneho dirigi na baha y maneha gastonan di trahadonan temporal. Pa loke ta experticio, ya caba a pone un limite di 130 porciento di e salario pa ora di Prome Minister.

Saca politica for di nombramento di trahado publico

DRH, esta Direccion di Recurso Humano lo pasa den un revision pa mehoracion. E funcion di un Recurso Humano adecuado y bon ekipa ta un di e rekisitonan pa ehecucion di e condicionnan. P’esey lo tin un maneho strategico di personal, cu ta inclui planificacion, evaluacion di produccion, introduccion di un maneho di prestacion (gratificacion segun merito) den e aparato publico, limitacion di politica den asuntonan di personal.

Pa loke ta huurmento di edificio, tambe lo tin investigacion pa e necesidad y costo, y con ta bay baha esakinan. E obhetivo ta pa yega na un reduccion di 20 porciento den 5 aña.

Y pa mehora e calidad y eficiencia di servicio publico, e proceso di digitalisacion unda cu por lo mester keda implementa.

Aviacion

E entidad lo mira con pa amplia e conectividad aereo entre e paisnan Hulandes den Caribe, pa medio di fortificacion di e sistema di aviacion denter di Reino. Aki por pensa riba cooperacion y organisacion di procesonan di trabou uniforma, segun exigencianan di siguridad internacional, dirigi riba eficiencia y reduccion di costo. ICAO cu ta e organisacion internacional di aviacion civil ta rekeri mehoracion di maneho y comparticion di conocemento.

E trayecto di tur e procesonan aki, lo keda determina a base di e agenda di ehecucion di COHO.

Mester bisa cu hopi di e recomendacionnan aki, particularmente riba e aspecto di e aparato publico, hopi di e intencionnan di COHO ta similar na e consehonan cu Raad van Advies a duna y cu Bon Dia Aruba a publica.