Colaboracion entre Post Aruba cu Aruba Art Fair 2022

Diaranson mainta, minister di Asunto Economico, Geoffrey Wever a anuncia e colaboracion entre Post Aruba y Aruba Art Fair 2022, caminda lo ilustra un cantidad pinturanan original cu Post Aruba tin den nan coleccion como e arte original cu a ser usa pa nan stampianan.

Den e exhibicion ta bay tin arte inclui for di aña 1996 te cu 2019, algun cual nunca a ser mira publicamente.

Tito Bolivar, director di ArtisA, organisador di entre otro Aruba Art Fair cu Art Fashion, a splica cu durante siman di Art Week ta celebra diferente evento pa stimula arte, creacion y tambe economia di artistanan local y vendors cu ta presente den Art Fair. Ayera nan tabata anunciando e “pacto cu a bin entre ministerio di Economia y Post Aruba, na unda cu nos ta treciendo e coleccion di Post dilanti pa asina Aruba completo por wak y admira y cera conoci cu kico Post tin.”

Minister Geoffrey Wever a gradici Bolivar pa informa cu Post Aruba NV ta dispone di un coleccion di arte hopi original, hopi bunita y unico. “Cada stampia tin un obra di arte como su base, y e arte aki tabata den archivo di Post.”

Wever a bisa cu ta danki na Tito su iniciativa cu a trece e idea dilanti pa trece e obranan aki como un coleccion, pidiendo cooperacion di ministerio di Asunto Economico. “Mi ta kere e ta un hopi bunita colaboracion caminda nos ta yuda e ora tambe trece contenido pa e area di p’ariba di brug”, Wever a bisa. “Como minister di Economia mi ta kere cu prioridad pa e gobierno aki ta pa nos trece actividad economico pa San Nicolas.” Y segun Wever, stakeholdernan na San Nicolas semper a boga pa San Nicolas ta e “creative city”. “Esaki ta nifica cu nos tin cu trece contenido, y esaki ta un forma hopi original caminda cu nos por trece nos arte local, cu ya tabata existi caba, p’ariba pa asina nos trece contenido pa turista, local, pa hende por bin area di San Nicolas.” Asina lo crea desaroyo cu ta desea pa area di San Nicolas.

Relacionista Publico di Post Aruba NV, Katharine Lacle a bisa cu Post Aruba NV ta orguyoso y contento cu despues di hopi aña cu nan obranan di arte tabata warda, finalmente por exhibi esakinan. Desde Status Aparte na aña 1986 cu Aruba a cuminsa emiti su mesun stampianan di post nan a cuminsa colecta obranan di arte.

Lacle a comenta tambe cu pa motibonan economico, e cantidad di stampia cu ta emiti pa aña a disminui. “Temponan aya nos tabata saca 10, 12 emision pa aña. Nos a reduci e cantidad pa motibonan economico, awo nos ta emitiendo seis emision pa aña. Tambe e cantidad di stampia pa emision tin ora nos tabata emiti 10, 12 den un serie. Actualmente esey a reduci na 4 of 6 maximo.”

El a bisa cu e obranan cu ta bay exhibi, cual ta alrededor di 50 piesa unico, ta di diferente artista local cu a yega di haci diseño pa nan stampianan, entre otro Gustave Nouel, Angiolina Henriquez, Armando Goedgedrag, Nigel Matthew, Ludwig de L’isle, Ronald Lemminga y Stan Kuiperi.
Lacle a bisa cu a scoge e artistanan cu ta bay inclui den e exhibicion door di diferente tematica cu tabata kier inclui den e exhibicion. “Nos ta hopi contento di parti di directiva y gerencia di Post Aruba cu nos por ta presente e aña aki den Art Fair”, Lacle a bisa.

Tocante e Art Fair cu ta bay tuma lugar e weekend aki dia 4, 5 y 6 di November, Bolivar a expresa cu diabierna, diasabra y diadomingo ta bay ta tres dia totalmente diferente. Diabierna ta dedica na San Nicolas, na unda cu mayoria di presentacionnan, cantante, poeta tur ta bin di e area di San Nicolas of tin relacion cu San Nicolas. Diasabra ta bay ta dedica na hubentud, cu Gang di Arte, Arte di Palabra, diferente scol di baile manera Club di Movimento cu ta celebrando su 25 aña – tin otro clubnan celebrando 35 – tur e cosnan cu ta pasa rond di aña cu no ta haya hopi exposicion ta bin San Nicolas pa por expresa nan mes dilanti di un publico grandisimo.

Y diadomingo ta bay tin un parada multicultural den Art Fair. “Den esaki nos ta celebra cu eigenlijk Aruba ta un isla multicultural”, Bolivar a expresa. “Si nos wak bon, nos tur ta bin di un caminda. Si bo a nace akinan of no, bo ancestronan un of otro manera ta bin di otro pais, y esey ta haci Aruba asina special.” El a agrega cu nos tin 108 nacionalidad cu ta biba den harmonia na Aruba, “y mi ta kere cu esey ta un di e secretonan di e One Happy Island.”