Den ora nan di diaranson marduga, 28 di januari, autoridad nan a tuma nota di un contacto sospechoso nabegando den direccion di Aruba. Miembro nan di Centro Operacional Maritimo (MOC) di Wardacosta inmediatamente a pidi asistencia di un unidad di Metal Shark y tambe un avion di Wardacostapa sali den direccion di e contacto.
Na momento cu a yega cerca di e posicion di e contacto, a tuma nota cu ta trata di un boto cu 7 persona riba dje. Den e boto tambe a mira diferente pakete a bordo. Inmediatamente a intercepta e lancha y a bay back Steunpunt pa asina continua cu e caso. Ta trata di 7 hende homber cu nacionalidad Venezolano y un cantidad di droga cu nan a purba di hiba Aruba.
Tambe a pidi asistencia di e helicopter di Wardacosta pa ehecuta un control riguroso na diferente parti di costa di Aruba . Den un cooperacion hunto cu diferente departamento di Cuerpo Policial di Aruba, a logra di detecta y tambe recupera un cantidad di pakete den area noordoost di Aruba. A entrega tur 7 individuo y tur droga na Cuerpo Policial. Miembro nan di Cuerpo Policial lo continua cu e investigacion y entretanto a logra di destrui tur droga.
