Recientemente a tuma luga e anochinan di graduacion pa Havo y Vwo, esaki a tuma luga den e Hyatt Ballroom.
Durante dos anochi yena cu alegria y emocion, graduadonan di Havo y Vwo a bini hunto pa asina celebra nan gran logro. Mayornan y docentenan hunto cu rectorado, directiva, mandatarionan y demas invitadonan a pasa un anochi ameno. E aña aki Colegio Arubano su Havo a logra 70% cu a obtene nan diploma y pa Vwo 87%, sigur un porcentahe halto caminda cu a logra mas cu 240 alumno cu tin nan diploma den nan man. Colegio Arubano ta conoci pa ta un scol secundario riba nivel di Havo/Vwo cu alrededor di 1400 alumno, cu 65 aña di experiencia, brindando nos hobennan un formacion y preparacion riba standardnan internacional cu un personal cualifica y cu cada dia ta percura pa bin cu proyectonan cu ta prepara nos hobennan cu habilidadnan di siglo 21. Colegio Arubano ta activo continuamente y ta percura pa durante aña escolar banda di su curiculo, e alumnonan participa den actividadnan social, intercambio internacional, cultural, caricativo, artistico y deportivo. Colegio Arubano a participa e aña aki den varios competencia y a logra trece back varios premio. Colegio Arubano kier a gradici en particular su personal, docentenan, alumnonan, mayornan pa e exito di e aña escolar tras di lomba y sector priva cu tambe ta yuda realisa proyectonan na beneficio di nos hobennan. Sperando cu e aña escolar 2023-2024 cu lo cuminsa na Augustus ta uno sumamente positivo y exitoso atrobe!
