(EFE) – Husticia Colombiano a condena na mas di cinco aña di prison ex-secretario di Presidencia, Bernardo Moreno Villegas, pa delitonan di trafico di influencia durante Gobierno di Alvaro Uribe (2002-2010), segun Fiscalia a informa diamars ultimo.
Sala Special di Prome Instancia di Corte Supremo di Husticia a haya Moreno responsabel di delito di trafico di influencia y a condenel’e na un castigo di cinco aña y shete luna di prizon, e pago di un multa y inhabilitacion pa eherce funcion publico pa 82 luna.
Ademas, den e veredicto a nenga e beneficio di detencion domiciliario pa lo cual a dicta orden di captura contra Moreno. Segun Fiscalia, Moreno, como director di Departamento Administrativo di Presidencia (Dapre) entre juli 2004 y augustus 2010, a probecha su funcion pa reuni cu e congresista na e momento ey Yidis Medina Padilla, pa asina ey logra su apoyo pa aprobacion di un ley cu tabata permiti reeleccion presidencial.
Den investigacion por a comproba cu ambos a acorda cu na cambio di apoya e reeleccion, Medina Padilla a obtene nombramento laboral pa varios persona cu a ser coloca na varios entidadnan publico. Asina mes Moreno a influencia di manera ilegal cinco funcionario publico pa concretisa e nombramento.
Na 2005 Uribe a logra aproba reeleccion presidencial inmediato, algo cu Constitucion Colombiano no tabata contempla y cu a permiti keda den poder pa dos mandato consecutivo.
Pero esaki no ta e prome condena cu Moreno ta haya pa hechonan di corupcion ora e tabata fungi como secretario di Presidencia.
27 di februari 2015, Moreno y ex-hefe di central di inteligencia di Colombia, Maria del Pilar Hurtado a ser haya responsabel di varios delito pa Sala Penal di Corte Supremo di Husticia.
Moreno e tempo ey a ser declara culpabel di varios delito como abuso di funcion publico y abuso di autoridad pa actonan arbitrario y no husto.
