(Infobae/El Pais) – Despues di e atentado terorista di siman na Bogota, realisa pa e guerrilleronan di Ehercito di Liberacion Nacional (ELN), gobierno di Colombia a exigi na e gobierno di Venezuela un ‘respuesta concreto’ tocante e eventual presencia de guerrilleronan y lidernan di ELN den nan teritorio.
Durante un conferencia di prensa, canciyer di Colombia, Carlos Holmes Trujillo, a probecha e oportunidad pa reitera na e gobierno di Venezuela cu nan ta pendiente ainda di un respuesta concreto di e presencia di miembronan di e guerrilla Colombiano den nan teritorio.
Autoridad Colombiano ta sigura cu varios hefe di ELN ta haya refugio na Venezuela. Den ocasionnan nan ta realisa nan atentadonan contra polis, poblacion civil, ehercito y infrastructura electrico y petrolero di Colombia, y despues nan ta huy pa haya refugio den e pais bisiña di Venezuela. Sinembargo Venezuela ta nenga e acusacion aki.
Canciyeria di Colombia a pidi e regimen di Venezuela pa verifica e presencia di miembronan di ELN den nan teritorio. Den caso cu ta algo positivo nan a pidi pa haci efectivo e circular cora di Interpol contra algun di nan lidernan.
