(AFP) – Cinco dia pasa, tres Mericano a muri na diferente circunstancia na Medellin, un destino special pa turistanan na Colombia cu den poco lunanan a mira un aumento di robo y morto di bishitantenan stranhero, e mayoria di nan Mericano.
Dakarai Earl Cobb, di 47 aña a ser haya morto dialuna ultimo na un hotel na Medellin sin su pertenecencianan y sin señal di violencia. Un dia prome, na e turistico bario Laureles, empleadonan di un hotel a haya e cadaver di Anthony Lopez, di 29 aña, den un camber y ken a comparti cu dos hende.
Ambos a ser identifica como ciudadanonan Mericano y nan casonan ta den man di Medicina Legal, e autoridad forensico na Colombia.
“Esaki ta sucede den marco di crimen organisa. Nan ta structuranan no hechonan aisla,” secretario di siguridad di Medellin, Manuel Villa a bisa tocante e aumento reciente di e mortonan di stranheronan na e ciudad, algun den circunstancianan sin aclaria.
Diasabra ultimo, e Mericano Manley Mark Conley a muri ora a cay for di un piso 17 di un apartamento cu EL a huur na e bario exclusivo di El Poblado, y 19 di januari, un lituano identifica como Tomas Gedrimas a mata su mes bulando for un piso 12 di un hotel na Laureles.
Di e cuatro morto aki den aña 2024, Villa ta señala cu “dos por a sucede pa utilisa un aplicacion di cita,” un modalidad di robo cu pa hopi biaha ta violento y cu a causa e morto di 7 stranhero na Medellin durante 2023, tres di nan Mericano, segun rapportnan oficial.
Na januari turistanan y autoridadnan a cuminsa sinti temor pa uso di scopolamine, un droga cu criminalnan ta usa pa horta y ta haci cu e victimanan ta perde nan memoria, cu dosisnan halto of combina cu alcohol por ta letal.
Entre november y december 2023, e “mortonan sospechoso” di 8 Mericano na Medellin a haci cu embahada di e pais ey a recomenda na su ciudadanonan di abstene nan mes di haci uso di aplicacionnan di cita na Colombia.
