Colombia bibando campaña electoral mancha cu violencia a pesar di alto al fuego

(EFE) – Diadomingo awor Colombia ta celebra eleccion local y regional den un contexto sin igual, cu alto al fuego y un supuesto boluntad di negociacion di dos grupo arma cu no a mira un reduccion di violencia, ya cu e campaña actual ta esun di mas violento den ultimo añanan.

Gruponan arma a comete 37 accion violento entre januari y 30 di september, segun e ultimo rapport di Defensor di Pueblo, cu ta calcula cu na e pais tin 113 municipio den riesgo extremo y 286 den riesgo hopi mas halto.

“Mientras mas cerca nos ta di eleccion, mayor ta e accionnan violento di gruponan arma ilegal contra candidato of lidernan,” defensor di pueblo, Carlos Camargo a bisa na momento di presenta e rapport.

Di su parti, Fundacion Paz y Reconciliacion (Pares) ta sigura cu “tin un panorama hopi lamentable:” tabatin 219 victima di violencia electoral entre 29 di october 2022 y 29 di augustus ultimo. Entre nan tin 34 asesinato y otro 31 candidato cu a sufri di atentado.

Manera ta e caso di lider indigena Jose Eduardo Timana, candidato pa conseho municipal di Pradera (Valle del Cauca) cu e partido gobernante Pacto Historico, kende dos sicario a asesina dia 4 di augustus.

Of esun di Leandro Sanchez, candidato pa conseho di Honda (Tolima) cu partido di derecha Creemos, tambe asesina dilanti di su cas.

Tanto Pares como e Defensor ta considera cu den ultimo lunanan a registra un aumento di violencia.

“E ambiente cu nos tin awe rond di eleccion regional ta hopi preocupante, tin un ambiente di miedo y insigur, y esey ta bay afecta e proceso democratico,” sub-director di Pares, Laura Bonilla a bisa.

Violencia den eleccion local semper ta mayor cu esun di eleccion nacional pa motibo cu ta mas facil pa un grupo arma of mafia influi driba un alcalde pa haya beneficio compara cu un presidente.

Ademas, “tur grupo arma ta bay busca pa afecta democracia pasobra parti di nan ser ta depende di disciplina social y di control teritorial cu nan por logra di haya,” Bonilla a splica.

Despues di scucha e alerta di Defensor di Pueblo cu tabatin 300 municipio den riesgo na e pais, presidente Colombiano, Gustavo Petro a sigura cu esey tabata falso y cu Gobierno ta bay garantisa eleccion na tur teritorio nacional.

Pares no tin duda cu esaki por ta asina. Ehercito a traves di Plan Democracia a desaroya un operativo “potente” cu refuerso den varios zona critico cu ta bay ta capaz di “reacciona lihe” si tin un incidente, pero pa protege e derecho di e candidatonan pa haya un funcion, “no tabatin mucho efectividad.”