Conseho Nacional Electoral (CNE) a habri un investigacion preliminar contra e mandatario Colombiano, Ivan Duque; e gerente di su campaña presidencial, Luis Guillermo Echeverri, y su partido, Centro Democratico, pa e “presunto violacion di norma electoral riba financiacion”.

Ayera diamars, den un comunicado CNE a detaya cu e comienso di e investigacion tin relacion cu “supuesto aporte economico di e empresario Venezolano, Oswaldo Cisneros pa un cifra di 300.000 dollar” pa e campaña cu a hiba Duque na presidencia na aña 2018.

Constitucion Colombiano ta prohibi campañanan electoral di caracter nacional di ricibi donacion for di stranhero.

Investigacion a cuminsa pa via di yamadanan cu Fiscalia a tap di Maria Claudia Daza, ken tabata asesor di ex-presidente Alvaro Uribe y awe ta fuera di e pais cu e fayecido ganadero Jose Guillermo ‘Ñeñe’ Hernandez y cu e director di Centro Democratico, Nubia Stella Martinez, riba e supuesto aporte di Cisneros.

Pa e motibo aki, CNE a cita Daza y Martinez pa declara riba e yamadanan telefonico, asina como Echeverri “den su condicion di gerente di campaña” pa splica e hechonan cu tin relacion cu e financiacion di e aspiracion di Duque.

Na maart, Fiscalia a cuminsa haci investigacionnan contra personanan cu por ta involucra den e combersacionnan cu a tap di ‘Ñeñe’ Hernandez, den cual e ta papia di un supuesto compra di voto pa e campaña di Duque na departamento di La Goajira y tambe a menciona e ex-presidente Uribe (2002-2010).

 

 

 

LEAVE A REPLY

Please enter your comment!
Please enter your name here