Gobierno Colombiano a presenta diadomingo pasa un ‘Plan di Impacto’ na balor di casi 712.000 miyon di peso (229 miyon di dollar), pa apoya e departamentonan na frontera cu Venezuela pa enfrenta e efecto di e crisis di e pais Caribeño.
E medidanan a ser anuncia pa e presidente Colombiano, Ivan Duque, den un reunion celebra na Cucuta cu e gobernadornan di e departamento frontera na e Norte di Santander, Arauca, Cesar, La Guajira, Vichada y Guainía.
E pakete ta dividi den tres area grandi, cual ta fomento di inversion, competitividad y empleonan nobo: atencion humanitario y salubridad y fortalecemento institucional.
Duque a referi na e plan como ‘un reaccion di e Gobierno nacional’ cu ‘50 medida cu tin specifico alcance pa cada uno di e departamento di frontera y medida transversal pa tur”.
E presidente Colombiano a reuni na Cúcuta cu e secretario di Estado di Merca, Mike Pompeo diadomingo pasa, y a afirma cu e crisis ta consecuencia ‘di e desolacion grandi cu e dictadura a trece pa Venezuela, y cu a causa pobresa na e pais, y a caba cu tur iniciativa priva’.
E medidanan ta inclui un linea special di credito cu 200.000 miyon di peso (casi 64,2 miyon di dollar) di e Financiero di Desaroyo Teritorial (Findeter) pa inversion den e seis departamento na infrastructura social, cu ta comprende educacion, salud, construccion, industria cultural y creativo, acuaducto, saneamento y energia renovabel.
“Gobierno ta consciente di e balentia y esfuerso cu e habitantenan di e parti di e pais aki a mustra, y p’esey nan ta trahando e structura di e ‘Plan di Impacto’ cu awe nos ta presenta, pa sigura cu e situacion lo converti den un plataforma pa fortalecemento social y economico” vice-presidente Colombiano, Marta Lucía Ramírez, a bisa.
