Colombia: Grupo di Lima cu presion diplomatico; Merca ta bay Conseho di Siguridad

Grupo di Lima, e paisnan di continente cu ta di acuerdo encuanto e ilegitimidad di e actual regimen di Nicolas Maduro, a reuni ayera na Bogota, despues di e intento fracasa di drenta teritorio Venezolano cu e ayudo humanitario almacena na Cucuta, Colombia. E unico tema tabata e crisis na Venezuela.

E canciyer di Colombia, Carlos Holmes, a habri e reunion, y a reafirma e compromiso di su pais cu e transicion democratico y restablecimento di e orden constitucional na Venezuela.

E vice-canciyer di Peru, Hugo De La Zela, a indica cu: “Dia 23 di februari e dictadura a mustra su cara represivo por completo, ya no tin duda cu e dictadura no tin limite den reprimi su propio pueblo.” “A yega e momento di adopta mas medida pa isola e regimen, riba tereno politico y financiero,” el a bisa.

Presidente di Colombia Ivan Duque a referi na e sucesonan di diasabra pasa y a rechasa e “actonan di barbarie cu henter mundo por a mira, y cu ta significa e seyo di final di e dictadura.”

Presidente encarga, Juan Guaido, tabata e invitado special di e reunion. E mandatario Venezolano a sigura cu despues di e hechonan di dia 23 di februari, ta momento pa actua diplomatico y directamente, “cu tur e scenarionan internacional posible, di acuerdo cu constitucion Venezolano, cu tur forsa.”

Mientras e paisnan Latinoamericano a mustra cautela den nan declaracionnan, y a exclui e uso di violencia pa deshaci di e regimen di Maduro, vice-presidente Mike Pence tabatin un otro tono. El a mantene cu “tur opcion ta riba mesa” y a repiti e invitacion di presidente Trump na e militar y funcionarionan Venezolano di uni na banda constitucional, y a informa cu gobierno Mericano lo impone mas sancion riba e circulo alrededor di Maduro.

Tambe a anuncia cu Merca a pidi un reunion di urgencia di Conseho di Seguridad di Nacionnan Uni pa awe. Aunke e resultado di tal reunion, cu presencia di Rusia y China, lo no resulta den un resolucion conhunto, e ta parce un paso necesario pa trata e tema na e nivel aki. Tambe gobierno Mericano, a traves di Mike Pence, a anuncia 56 miyon dollar mas na ayudo humanitario pa Venezuela durante e encuentro di e Grupo di Lima.

 

You May Also Like

OEA ta cuestiona cu oposicion Venezolano lo participa den eleccion municipal

Secretario general di Organisacion di Estado Americano (OEA), Luis Almagro, a bisa cu oposicion  Venezolano ...

Venezuela: Manifestacion anuncia pa awe diasabra

E presidente interino di Venezuela, Juan Guaido, a ofrece un rueda di prensa ayera, ...

No tin poscuido pa hende cu sentencia TBS na Corsou

WILLEMSTAD – J.L. cu tin sentencia di TBS despues di un aña den Foba, ...

Aruba Airlines afecta pero no a bati alarma ainda

Aruba Airlines lo posiblemente ta drentando un situacion fastioso mirando e embargo tuma pa ...

Venezuela: Crisis ta yegando na cuerponan uniforma

Caracas – E crisis Venezolano a cuminsa expande den e institucionnan gubernamental cu mester ...

Gobierno Nacional di Colombia ta financia metro di Bogota

Gobierno nacional di Colombia ta bay financia e proyecto di metro di capital Bogota.  ...