(Reuters) – Presidente recien eligi di Colombia, e iskierdista Gustavo Petro diaranson ultimo a reuni cu su opositor politico principal, ex-mandatario y lider di derecha Alvaro Uribe, ken a anuncia cu for di oposicion ta bay apoya e iniciativanan pa pobresa, siempre y cuando no afecta sector productivo.
Esaki tabata e prome encuentro ‘cara a cara’ den e historia reciente di e dos dirigente politico cu a mantene diferencianan publico y contradictorio riba temanan sensibel como seguridad y modelo economico.
Petro, un economista di 62 aña kende lo bira e prome presidente di iskierda na Colombia, a compromete su mes den campaña pa reduci e pobresa di casi 50 miyon habitante di e pais por medio di programanan social ambicioso y economico cu a lanta temor den mercadonan di inversion.
“E combersacion cu ex-presidente Uribe tabata di probecho y cu respet. Nos a haya e diferencia y puntonan comun. Semper lo tin dialogo gobierno-oposicion” Petro a skirbi riba su cuenta di Twitter.
Petro a expone un acuerdo nacional pa logra aprobacion na Congreso di e reforma economico y social cu den su concepto, e pais mester pa supera pobresa, desigualdad y exclusion.
E mandatario eligi, cu no tin mayoria na Congreso, a logra cu partido Aliansa Berde lo apoya su gobierno den e legislativo, mientras cu otro forsanan politico como Partido Liberal a anuncia nan disposicion pa duna respaldo na cierto iniciativanan di Petro den Senado y Camara di Representante.
Uribe, ken a goberna Colombia den dos periodo consecutivo entre 2022 y 2010, a bisa cu e dialogo cu Petro tabata franco y cu respet cu a inclui temanan como salud, reforma di sistema di pension, subsidio pa hende grandi pober, siguridad, microtrafico, transicion energetico y paz.
