(AFP) – Alcalde di Medellin diabierna a elogia e construccion di un mega-prison na su ciudad, e di dos mas grandi na Colombia, convertiendo den e lider Latino Americano mas recien di imita e maneho di man duro contra violencia di gang di presidente Salvadoreño, Nayib Bukele.
E prison di seguridad halto ta bay tene mas di 1.300 prisonero, segun alcalde di Medellin, Federico Gutierrez. E ta bay ta financia cu fondo publico y priva.
E ciudad, ubica den centro di Colombia, antes tabata entre esnan mas violento di mundo prome cu morto di capo di droga, Pablo Escobar na 1993.
Un oficial a bisa AFP diabierna cu e mega-prison ta modela riba e facilidad CECOT di Bukele, cu a ricibi critica di gruponan di derecho humano tocante abuso reporta.
E movida ta e proyecto di prison mas recien na Latino America cu ta copia e maneho di CECOT, incluyendo di Ecuador y Costa Rica.
Presidente electo di Chile, Jose Antonio Kast tambe a bishita CECOT recientemente y a pidi Bukele pa ayudo pa mehora e sistema di prison di su pais.
Gutierrez a ricibi un tour di e sitio di construccion di e prison diahuebs y a priminti cu e facilidad ta bay ta vigila pa su propio team di seguridad, no pa oficialnan di agencia nacional di prison.
E prison, cu ta spera di keda cla na 2027, ta bay tin sistema tecnologico pa preveni prisonero di comunica, ya cu un di e formanan mas comun di extorsion na e pais ta origina for di prison.
Prisoneronan ta bay ta “priva di hopi privilegio,” e derechista Gutierrez a bisa reporteronan.
Cu eleccion presidencial tumando lugar dia 31 di mei, seguridad ta un preocupacion top pa Colombianonan.
E faboritonan ta e senador iskierdista, Ivan Cepeda, un di e arkitectonan di e politica controversial di presidente Gustavo Petro di negocia cu gruponan arma; y e abogado derechista, Abelardo de la Espriella.
De la Espriella, kende tin sosten di partido di Gutierrez, a propone pa construi mega-prison unda e prisoneronan lo ta “dies piso bao tera” y lo sobrevivi di “awa y pan.”
