Colombia: Merca ta bay sanciona compania maritimo cu ta facilita “migracion iregular”

(NTN24) – Gobierno di Merca a adverti ayera dialuna cu ta bay sanciona e empresanan maritimo Colombiano cu ta facilita “migracion iregular.”

Asina, un di e prome medidanan ta bay ta e restriccion di visa na e directivonan di e companianan en cuestion, loke ta bay impedi na ingreso na e teritorio Mericano. Esaki segun vocero di Departamento di Estado Mericano, Matthew Miller a bisa mediante un comunicado di prensa, den cual a menciona cu e empresanan en cuestion “ta probecha di e migrantenan vulnerable.”

“E empresanan aki ta probecha di e migrantenan iregular vulnerable operando servicionan concebi principalmente pa facilita e migracion iregular na Merca,” Miller a manifesta. “Varios empresa cu ta provee transporte maritimo ta facilitando conscientemente e movemento iregular di migrantenan y ta exponiendo nan na explotacion y violencia,” el a agrega, sin specifica cu compania.

Den e sentido aki, el a indica cu e sancionnan no ta busca solamente pa castiga esnan responsable, sino tambe pa manda “un señal” memey di e crisis migratorio cu Merca ta enfrentando, a pesar di e restriccionnan imponi pa administracion di presidente Joe Biden memey di e disputa electoral.

“Ningun persona mester probecha di e migrantenan vulnerable: ni traficantenan di persona, ni empresanan priva, ni funcionarionan publico,” el a insisti.

Mester menciona cu algun luna atras, gobierno di Biden a anuncia cu ta bay restringi visa na doñonan y directivonan di companianan di vuelo charter, di transporte terestre y maritimo cu ta facilita e “migracion iregular.”

Segun datonan oficial, e patruya fronteriso Mericano a intercepta 189.372 biaha migrantenan y solicitantenan di asilo na maart. Mayoria di nan tabata Latino Americanonan kende a crusa e frontera cu Mexico ilegalmente.

Maske e cifra aki ta menos cu na februari y december ultimo, gobierno Mericano ta pronostica cu e cifra ta bay aumenta cu e yegada di temporada di calor na mei, juni y juli.