(AP) — Oficina di ONU pa derechonan humano na Colombia a adverti diamars cu cinco grupo indigena na un rango montañoso ta enfrenta extincion ‘fisico y cultural’, un menasa critico cu ta bin di gruponan arma batayando pa nan teritorio, y proteccion estatal insuficiente.

Scott Campbell, representante di Colombia pa e Alto Comisionado di ONU pa Derechonan Humano, a bisa den un declaracion cu e riesgo di extincion fisico y cultural di e Pueblo Indigena di Sierra Nevada de Santa Marta ta “un tragedia andando cu nos por y mester preveni.”

Campbell a urgi gobierno Colombiano pa protege e gruponan indigena Kogui, Wiwa, Kankuamo, Arhuaco y Ette Naka, kende nan poblacion combina ta aproximadamente 54.700 persona.

E declaracion di Campbell a bin despues di un bishita na e region Sierra Nevada, unda oficialnan di ONU a papia cu representantenan di e tribunan indigena aki.

“E gruponan aki ta bao diferente forma di atake cruel di gruponan arma no-estatal,” Campbell a bisa, resaltando e “repercusionnan devastador riba nan bida, nan tereno, nan teritorio, nan autodeterminacion… y nan spiritualidad.”

Na 2022, UNESCO a agrega e conocemento ancestral di e gruponan indigena aki na su lista di Herencia Cultural Intangible di Humanidad. E reconocemento ta resalta e “rol fundamental” cu nan tradicionnan ta desempeña den preserva Sierra Nevada de Santa Marta – un rango di montaña cu ta sali directamente for di lama Caribe y tin cumbrenan cu sneeuw alcansando casi 6mil meter.

Pero pa hopi aña, e pueblonan indigena di Sierra Nevada ta bao atake di colonistanan, y awo di gruponan rebelde.

Campbell a bisa cu e gruponan rebelde den e area ta imponiendo toque de queda riba comunidadnan indigena y interferiendo cu nan asambleanan local. El a agrega cu centenares di indigena for di Sierra Nevada de Santa Marta a keda desplasa forsosamente, mientras aña pasa, un lider di comunidad Arhuaco a ser asesina y un miembro di tribu Kogui a desaparece.

Gobierno Colombiano ta lucha pa calma areanan rural unda gruponan rebelde y gangnan traficante di droga ta bataya pa teritorio bandona pa e Forsanan Arma Revolucionario di Colombia (FARC), e grupo di guerrilla grandi cu a firma paz cu gobierno na 2016.

Presidente Gustavo Petro a lansa negociacionnan di paz cu mayoria di e gruponan rebelde restando na e pais, pero e negociacionnan ainda no a duna ningun resultado te awo.

Campbell a urgi gobierno pa protege e pueblonan indigena den Sierra Nevada, no solo mediante forsa militar, pero door di provee miho acceso na cuido di salud, educacion y oportunidadnan di empleo.

“E situacion violento tin raiz den disputanan tocante control di teritorio, rutanan di trafico di droga y varios forma di actividad economico ilicito di gruponan arma no-estatal,” Campbell a bisa.