(EFE) – Presidente Colombiano Gustavo Petro, ayera diabierna a anuncia e retiro di su hefe di Gabinete, Laura Sarabia, y di embahador na Venezuela, Armando Benedetti, cu ta involucra den un scandal di tapgesprek y posibel abuso di poder.
“Mientras ta haci investigacion, mi funcionario stima y e embahador ta retira di Gobierno pa cu desde e poder cu nan funcion ta implica no por tin desconfiansa,” Petro a manifesta den un ceremonia di promocion militar na Bogota.
E supuesto hortamento di un tas cu placa cash den Sarabia su cas cometi supuestamente pa Marelbys Meza, un muhe cu a traha pe como baby sitter, ta e causa di un serie di actuacionnan iregular cu tin Sarabia instabil den Gobierno y cu te ayera tabata e man drechi di Petro.
Sarabia a yama Benedetti pa pidi colaboracion den e situacion aki, na unda a bira conoci cu e embahador a biaha cu Meza pa Venezuela pa asina ey no haci publico loke a pasa, pero despues e scandal nacional a explota ora tabatin un investigacion clandestino den cual a somete e ex-baby sitter na un prueba di poligraaf na Casa de Nariño.
Debi na e situacion aki, a cuminsa e diferencianan entre funcionarionan di Gobierno, ya cu un di nan tabata acusa e otro di leak informacion na prensa tocante e proceso y e investigacion iregular den cual a sigura cu Marelbys Meza tabata pertenece na e organisacion criminal Clan del Golfo, algo pa hustifica e tapgesprek, segun e fiscal general Rodrigo Barbosa a informa.
E scandal aki ta produci na momento cu Gobierno di Petro ta bibando oranan di halto y baho, cu problemanan den diferente frente.
Di un banda, su reformanan social a stop na Congreso y coalicion di Gobierno a haya sa cu congresistanan di partido Alianza Verde a presenta un proposicion pa “warda den lachi” e reforma polemico di salud.
