(infobae) – Na funeral di Senador y pre-candidato presidencial, Miguel Uribe Turbay, su tata, Miguel Uribe Londoño a pronuncia un discurso den cual a manifesta e dolor cu e ta sinti na momento di enfrenta, un biaha mas, un tragedia cu a cambia su bida di manera ireversible.

Miguel Uribe Londoño, durante un ceremonia den Catedral Primada, a despedi di su yiu homber cu un mensahe den cual el a afirma: “Nos no tin ningun duda di unda violencia ta bin, nos no tin duda di ken ta promov’e, nos no tin duda di ken ta permitie. Nos mester enfrenta esaki y bisa no mas, no mas, no mas.”

Den respuesta na e palabranan aki, presidente Petro a comparti riba su cuenta di X e grafico tocante e evolucion di homicidio na Colombia. Hunto cu e imagen, e mandatario a skirbi e siguiente mensahe: “Esaki ta e realidad di homicidio na Colombia. Y si tin culpable den expansion di e sanger derama.”

Riba e grafico comparti pa e presidente por observa e tasa di homicidio pa cada 100mil habitante di Colombia entre 1980 y 2023, segun dato di Polis Nacional.

E registro ta mustra un aumento fuerte entre mita di añanan 1980 y comienso di añanan 1990, alcansando su punto mas halto na 1991 cu 84 homicidio pa cada 100mil habitante. For di e aña ey, e tendencia general ta di descenso, cu algun fluctuacion den periodonan puntual.

Durante ultimo decada, e cifra a mantene na nivelnan considerablemente mas abao cu den e epoca di mayor violencia, variando entre 23 y 27 homicidio pa cada 100mil habitante. Na 2023, e indicador a keda na 26, loke ta representa un reduccion significativo compara cu e decadanan anterior, maske ainda ta mas halto cu standardnan internacional di criminalidad abao.

Den e periodo di gobierno di Gustavo Petro (2022-2023), e grafico ta mustra cu e tasa di homicidio a mantene na 26 pa cada 100mil habitante. Esaki ta indica cu, al menos den e prome dos aña di su mandato, no a registra variacion significativo compara cu e cifra hereda di 2021, tempo cu e indicador tabata na 27, segun e imagen cu e mandatario a comparti.

Di otro banda, tata di Miguel Uribe Turbay den su discurso a cualifica e asesinato di su yiu como un atake terorista y un magnicidio, cu el a describi como un delito di lesa humanidad cu no ta prescribi. “No ta casualidad cu e atake aki a sucede net ora Miguel tabata hisando su bandera di lucha: un Colombia cu tin seguridad di nobo, pasobra solamente cu seguridad nos ta bay tin paz.”

Londoño tambe a resalta cu e ideanan di e senador, marca pa su experiencianan personal y e legado di Alvaro Uribe Velez, a acerk’e na e Centro Democratico. El a recorda cu ambos a traha hunto den elaboracion di propuesta pa enfrenta e problemanan principal di e pais, y a subraya: “Awe, e ideanan di Miguel ta mas vigente cu nunca.”

El a pidi pa responde cu moderacion, sensates y cohesion nacional, lagando un banda cualkier yamado pa represalia y apelando na e compromiso ciudadano cu defensa di democracia. Ademas, el a urgi sociedad pa uni den buskeda di paz, pa preserva e recuerdo di su yiu, y stop e violencia cu aña 2026 na caminda. El a gradici sosten di Alvaro Uribe y di Centro Democratico, y a confia nan e mision di mantene seguridad como fundamento pa construi paz.