(infobae) – Presidente Colombiano, Gustavo Petro, a referi na un carta nobo publica pa ex-canciyer Alvaro Leyva Duran, den cual e ta continua acusando e presidente di tin un problema grave di “adiccion” di droga.
Durante un evento celebra ayera na Plaza de Bolivar di Bogota, Petro a señala e motibonan pakico, segun e, su ex-canciyer a skirbi e carta recien, cu ta continuacion di un carta inicial publica algun siman atras.
“E ta buscando congresistanan di Comision di Acusacion pa nan baha e presidente pa e hechonan mentiroso ey cu el a pone den e carta, y ta reuni cu otro Colombianonan pa esey. E plan ta coordina, desespera pasobra ya nan no a logra, danki na sentencia di Corte Constitucional, di baha e presidente pa e financiamentonan di campaña,” el a bisa.
Di otro banda, el a señala Mario Diaz-Balart, miembro di Camara di Representante di Merca, di ta esun cu ta orkestra e reunionnan pa e supuesto plan cu ta busca sak’e for di poder.
“Boso sa ken ta dirigi e reunionnan? No ta un Colombiano, ta e senador di Merca, Diaz-Balart, di derecha extremo (…) Mi no ta critica e gobierno actual di Merca pasobra mi ta kere cu no ta, mi ta spera mi no ta kiboca, ta e derecho extremo Mericano, e mesun cu a mata John F. Kennedy,” el a señala.
Petro a acusa Diaz-Balart como “e hefe” di e plan, argumentando cu loke ta busca ta pa “usa Congreso pa baha e presidente.”
“Si esey pasa, mester rementa e revolucion Colombiano pasobra ta un noticia falso di e Nazinan na Merca y mi ta denuncie (…) No ta pasobra mi ta anti-gringo, mi no ta anti-gringo,” el a agrega.
E declaracion a bira conoci algun ora despues cu ex-canciyer Leyva a publica un carta nobo contra Petro, den cual a haci señalamentonan grave tocante supuesto comportamentonan cu e mandatario tabatin durante su biahenan.
Den e carta, Leyva a sostene cu e desaparicion di e hefe di estado durante un biahe oficial na Paris no tabata un hecho isola, sino “un reiteracion di su conducta cu ta pone den evidencia, un biaha mas, e gravedad di su condicion.”
